وفاقی حکومت قومی ذمہ داری کے تحت اپنا کردار نبھا رہی ہے، عطاء اللہ تارڑ

اسلام آباد ( پاک ترک نیوز) وفاقی وزیر اطلاعات عطاء اللہ تارڑ کا کہنا ہے کہ وفاقی حکومت قومی ذمہ داری کے تحت اپنا کردار نبھا رہی ہے۔
وفاقی وزیر اطلاعات عطاء اللہ تارڑ نے وزیر موسمیاتی تبدیلی مصدق ملک اور چیئرمین این ڈی ایم اے لیفٹیننٹ جنرل انعام حیدر کے ہمراہ میڈیا بریفنگ میں بتایا کہ وزیراعظم کی زیر صدارت مون سون کی بارشوں سے پیدا ہونے والی حالیہ سیلاب کی صورتحال پر اہم اجلاس ہوا۔اجلاس میں خیبر پختونخوا، گلگت بلتستان میں سیلاب کی صورتحال پر غور کیا گیا۔
وزیر اطلاعات عطاء اللہ تارڑ کا کہنا تھا کہ اجلاس میں امداد اور بچائو کی جاری سرگرمیوں کا جائزہ لیا گیا۔صوبائی حکومتوں کے ساتھ بہتر طریقے سے کوآرڈینیشن جاری ہے۔
ان کا مزید کہنا تھا کہ مون سون سے قبل نیشنل کمانڈ اینڈ کنٹرول سینٹر میں کئی اجلاس ہوئے جس میں تمام صوبائی حکومتوں کے نمائندے شریک ہوتے رہے۔پیشگی آگاہی نظام کے ذریعے این ڈی ایم اے کی طرف سے باقاعدگی سے ڈیٹا متعلقہ اتھارٹیز کو فراہم کیا جاتا رہا ہے۔
عطاء اللہ تارڑنے بتایا کہ صورتحال سے نمٹنے کے لئے قومی سطح پر کوششیں کی جا رہی ہیں۔وزیراعظم کی ہدایت پر این ڈی ایم اے صوبائی حکومتوں کے ساتھ رابطے میں ہے۔امدادی سامان اور ریلیف سرگرمیاں انجام دی جا رہی ہیں۔