اسلام آباد(پاک ترک نیوز ) پاکستان میں تعینات اٹلی کے نئے سفیر یوگو سیارلاتانی نے وزیراعظم محمد شہباز شریف سے ملاقات کی، جس میں پاکستان اور اٹلی کے دوطرفہ تعلقات اور باہمی دلچسپی کے امور پر تبادلہ خیال کیا گیا۔
ملاقات میں نائب وزیراعظم و وزیر خارجہ سینیٹر محمد اسحاق ڈار، وزیراعظم کے معاون خصوصی سید طارق فاطمی اور سیکرٹری خارجہ سفیر آمنہ بلوچ بھی موجود تھیں۔
وزیراعظم شہباز شریف نے پاکستان میں تعیناتی پر نئے اطالوی سفیر کا خیرمقدم کرتے ہوئے کہا کہ پاکستان اور اٹلی کے درمیان بہترین دوطرفہ تعلقات قائم ہیں۔
وزیراعظم نے اطالوی وزیراعظم جارجیا میلونی کے لیے نیک خواہشات کا اظہار کیا اور ان کے ساتھ اپنی سابقہ ملاقاتوں کا ذکر بھی کیا۔
شہباز شریف نے جارجیا میلونی کے مسلسل چار سال تک منصبِ وزارتِ عظمیٰ پر فائز رہنے پر مسرت کا اظہار کرتے ہوئے کہا کہ وہ اٹلی میں طویل ترین عرصے تک خدمات انجام دینے والی رہنما بن گئی ہیں۔
اطالوی سفیر یوگو سیارلاتانی نے ملاقات کا موقع فراہم کرنے پر وزیراعظم کا شکریہ ادا کیا۔
اطالوی سفیر نے کہا کہ وہ پاکستان میں اپنی تعیناتی کے دوران دونوں ممالک کے تعلقات کو مزید فروغ دینے اور مضبوط بنانے کے لیے بھرپور کوشش کریں گے۔ انہوں نے باہمی دلچسپی کے تمام شعبوں میں حکومت پاکستان کے ساتھ قریبی تعاون سے کام کرنے کے عزم کا بھی اظہار کیا۔
وزیراعظم شہباز شریف نے اطالوی سفیر کو دوطرفہ تعلقات مزید مضبوط بنانے کے لیے پاکستان کی جانب سے مکمل تعاون کی یقین دہانی کرائی۔
وزیراعظم نے کہا کہ زراعت، اطلاعاتی ٹیکنالوجی و مصنوعی ذہانت، صنعت، ٹیکسٹائل اور عوامی سطح پر رابطوں کے شعبوں میں اٹلی کے ساتھ تعاون کو مزید وسعت دینے کے لیے پاکستان مکمل تعاون فراہم کرے گا۔
