اسلام آباد(پاک ترک نیوز ) سعودی عرب کے نئے سفیر ڈاکٹر راجح تامی البغمی نے نائب وزیراعظم اور وزیر خارجہ اسحاق ڈار سے ملاقات کی، جس میں پاکستان اور سعودی عرب کے دوطرفہ تعلقات پر تبادلہ خیال کیا گیا۔
ترجمان دفتر خارجہ کے مطابق ملاقات میں دونوں ممالک کے درمیان دیرینہ برادرانہ تعلقات اور اسٹریٹجک شراکت داری کو مزید مضبوط بنانے کے عزم کا اعادہ کیا گیا۔
اسحاق ڈار نے کہا کہ پاکستان اور سعودی عرب کے درمیان دیرینہ برادرانہ تعلقات قائم ہیں۔ انہوں نے سعودی عرب کے ساتھ اسٹریٹجک شراکت داری کو مزید مستحکم بنانے کے عزم کا اظہار کیا۔
سعودی سفیر ڈاکٹر راجح تامی البغمی نے سعودی قیادت کی جانب سے پاکستانی قیادت کے لیے نیک خواہشات کا اظہار کیا۔
نائب وزیراعظم اسحاق ڈار نے خادم حرمین شریفین، سعودی ولی عہد اور سعودی قیادت کے لیے نیک تمناؤں کا پیغام دیا، جبکہ سعودی سفیر کے لیے ان کی نئی ذمہ داریوں میں کامیابی کی خواہش کا اظہار بھی کیا۔
