پشاور (پاک ترک نیوز )پشاور میں گورنر راج یا ایمرجنسی کے نفاذ کے تناظر میں سیکیورٹی انتظامات سخت کر دیے گئے ہیں، شہر کے ریڈ زون کو کنٹینرز لگا کر بند کر دیا گیا جبکہ کینٹ ایریا کی جانب جانے والے متعدد راستوں پر بھی رکاوٹیں کھڑی کر دی گئی ہیں۔
ذرائع کے مطابق رات گئے جی ٹی روڈ پر قلعہ بالاحصار اور یونیورسٹی روڈ پر تہکال کے مقام پر کنٹینرز لگا دیے گئے۔ کوہاٹ روڈ اور شامی روڈ سے پشاور کینٹ جانے والے راستے بھی ہر قسم کی ٹریفک کے لیے بند کر دیے گئے ہیں۔
ذرائع کا کہنا ہے کہ پشاور کینٹ، یونیورسٹی روڈ اور دیگر اہم علاقوں میں ناکہ بندی مکمل کر لی گئی ہے، جبکہ شہر کے مختلف مقامات پر وفاقی کانسٹیبلری کے اہلکار تعینات کر دیے گئے ہیں۔
پشاور میں فوجی گاڑیوں اور دستوں کی گشت بھی جاری ہے۔ دوسری جانب شہر کے مختلف علاقوں میں موبائل فون کے اشاروں اور انٹرنیٹ سروس میں بھی شدید خلل کی اطلاعات ہیں۔
تاہم، ان اقدامات کو گورنر راج یا ایمرجنسی کے باضابطہ نفاذ سے جوڑنے کے لیے سرکاری تصدیق سامنے آنا ضروری ہے۔
گورنر راج یا ایمرجنسی کی تیاری؟ پشاور کے ریڈ زون سمیت اہم راستے بند
