پشاور ( پاک ترک نیوز) خیبر پختونخوا میں انیس جولائی سے اب تک کے دوران صوبہ میں ہونے والی تیز بارشوں اور فلش فلڈ سے گھروں کی چھتیں و دیواریں گرنے اور سیلابی ریلے میں بہہ جانے کے باعث 18 افراد جانبحق جبکہ 19 افراد زخمی ہو گئے۔
پی ڈی ایم اے کے مطابق جاں بحق افراد میں 7 مرد, 8 بچے اور 3 خواتین جبکہ زخمیوں میں 11 مرد، 4 خواتین اور 4 بچے شامل ہیںِ ۔تیز بارشوں اور فلش فلڈ کے باعث مجموعی طور پر 30 گھروں کو نقصان پہنچا جس میں 23 گھروں کو جزوی جبکہ 7 گھر مکمل منہدم ہوئے۔
پی ڈی ایم اے کے مطابق حادثات صوبہ کے مختلف اضلاع پشاور، نوشہرہ، خیبر، مردان , بونیر، باجوڑ، شانگلہ، صوابی، چترال لوئر، دیر لوئر اور اپر، ایبٹ آباد، مانسہرہ، تور غر اور کرم اور شمالی و جنوبی وزیرستان میں پیش آئے۔
پی ڈی ایم اے کی جانب سے متاثرہ اضلاع کی انتظامیہ کو متاثرین کو جلد امدادی سامان فراہم کرنے کی ہدایت کر دی گئی ، پی ڈی ایم اے کے مطابق صوبہ کے تمام دریاوں اور ندی نالوں میں پانی کی سطع اور بہاو معمول کے مطابق ہے۔
یہ بھی پڑھیں: پنجاب میں بارشیں ،حادثات میں اموات کی تعداد 8ہو گئی
پی ڈی ایم اے کے مطابق تیز بارشوں کا یہ سلسلہ 23 جولائی تک وقفے وقفے سے جاری رہنے کا امکان۔ پی ڈی ایم اے نے پہلے ہی سے تمام ضلعی انتظامیہ کو الرٹ رہنے کے لئے مراسلہ جاری کیا ہوا ہے۔
پی ڈی ایم اے نے کہا عوام بلا وجہ سفر سے گریز کریں اور حساس سیاحتی مقامات کا رخ نہ کریں اور حکومتی اداروں کی جانب سے الرٹس/ اور ایڈوائزری پر عمل کریں۔
