لاہور( پاک ترک نیوز) پنجاب میں مون سون بارشوں کا سلسلہ جاری جاری ہے۔ وزیر آباد اور گردو نواح میں موسلا دھار بارش سے نشیبی علاقے پانی سے بھر گئے ۔ حافظ آباد اور فیصل آباد میں بارش سے نشیبی علاقے زیر آب آ گئے۔
شاہ کوٹ،کوٹ رادھاکشن ،پیر محل میں بارش سے گرمی کا زور ٹوٹ گیا۔لاہور کے کئی علاقوں میں بوندا باندی ہوئی ہے۔ میانوالی میں بھی رم جھم سے موسم خوشگوار ہو گیا، طوفانی بارشوں سے دریائے سندھ میں چشمہ بیراج اور جناح بیراج کے مقام پر پانی کے بہاؤ میں اضافہ ہو گیا۔ چشمہ بیراج کے تمام گیٹ کھول دیئے گئے۔
کوہ سلیمان کے متعدد علاقوں میں موسلا دھار بارشوں کے باعث ندی نالے بپھر گئے، سنگھڑ ندی اور کوڑا ندی طغیانی ،سیلابی ریلوں سے تونسہ اور دیگر علاقوں میں سیلابی صورتحال پیدا ہونے پر لوگ گھروں میں محصور ہو گئے۔ لیہ میں دریائے سندھ کی بے رحم موجیں بے قابو ہو گئیں ،دو سرکاری اسکول دریا برد ہو گئے۔
پنجاب بھر میں گزشتہ 24 گھنٹوں میں بارش اور آندھی سےدیواریں اور چھتیں گرنےسے8 افرادجاں بحق، 37 زخمی ہو گئے، گوجرانوالہ میں چھتیں اوردیواریں گرنےکے8مختلف واقعات میں3افرادجاں بحق، 14زخمی ہوئے، پاکپتن میں مکان کی کچی چھت گرنے سے 2 افراد جاں بحق، 2 زخمی، مری و کہوٹہ میں جزوی لینڈ سلائیڈنگ، درخت گرنے کے واقعات بھی رپورٹ ہوئے۔
یہ بھی پڑھیں: پنجاب اور خیبر پختونخوا میں بارشیں
خیبرپختونخوا میں بارشوں نے تباہی مچادی، 19 جولائی سے اب تک بارشوں سے 14 افراد جاں بحق اور 19 زخمی ہوگئے۔
پی ڈی ایم اے کے مطابق، مجموعی طور پر جاں بحق افراد میں 6 مرد، 6 بچے اور 2 خواتین ، زخمیوں میں 11 مرد، 4 خواتین اور 4 بچے شامل ہیں، تیز بارشوں کے باعث 28 گھروں کو نقصان پہنچا، 6 گھر مکمل منہدم ہوگئے۔
خیبر پختونخوا کی تحصیل جہانگیرہ میں بارش ،پانی بازاروں اور گھروں میں داخل ، ایک گھر میں پھنسے ہوئے بارہ افراد کو بحفاظت ریسکیو کر لیا گیا۔
