پاکستان میں سہ ملکی ٹی ٹونٹی سیریز کیلئے زمبابوے نے سکواڈ کا اعلان کر دیا

ہرارے (پاک ترک نیوز) پاکستان میں سہ ملکی ٹی ٹونٹی سیریز کے لئے زمبابوے نے اسکواڈ کا اعلان کر دیا ہے۔
زمبابوے کی ٹیم میں ایک تبدیلی کی گئی ہے، فاسٹ باؤلر بلیسنگ مزارابانی کمر کی انجری کی وجہ سے ٹیم میں شامل نہیں ہیں، ان کی جگہ نیومین نیامہوری کو اسکواڈ کا حصہ بنایا گیا ہے۔
زمبابوے ٹیم کی کپتانی سکندر رضا کریں گے جبکہ برائن بینیٹ، گریم کریمر، ریان برل، ٹینوٹینڈا ماپوسا، بریڈلی ایونز، کلائیو مڈانڈے،ویلنگٹن مساکاڈزا، تادیواناشے مارومانی، ٹونی مونیونگا، ڈیون مائرز، رچرڈ نگاراوا،تاشینگا میوزیکیوا، نیومین نیامہوری اور برینڈن ٹیلراسکواڈ کا حصہ ہیں۔
سہ فریقی سیریز میں سکندر رضا کی قیادت میں زمبابوے کا 15 رکنی سکواڈ پاکستان آئے گا۔ زمبابوے کی ٹیم سہ ملکی سیریز میں اپنا پہلا میچ پاکستان کے خلاف 17 نومبر کو راولپنڈی اسٹیڈیم میں کھیلے گی۔
راولپنڈی میں ہی 19 نومبر کو ان کا مقابلہ سری لنکا سے ہو گا، 23 نومبر کو زمبابوے کا مقابلہ لاہور قذافی سٹیڈیم میں ایک بار پھر پاکستان سے ہو گا۔ 25 نومبر کو زمبابوے سری لنکا کا دوبارہ سامنا کرے گا۔
سہ ملکی سیریز کا فائنل قذافی سٹیڈیم لاہور میں 29 نومبر کو کھیلا جائے گا۔