آر اے شمشاد
کون کرے گا وار اور کون ہوگا شکار ؟ پاکستان اور بنگلہ دیش کے درمیان دو ٹیسٹ میچوں پر مشتمل سیریز کا پہلا ٹیسٹ میچ کا آج سے آغاز ہو گیا ہے۔
میر پور میں شاہینوں کو بنگالی ٹائیگرز کا چیلنج درپیش ہے ۔پہلے ٹیسٹ میچ کیلئے دونوں ٹیموں نے بھرپور تیار کر رکھی ہے ۔ قومی سکواڈ میں متعدد نئے چہرے بھی موجود ہیں جو اپنی صلاحیتوں کا جوہر دکھانے کیلئے بالکل تیار ہیں ۔
قومی ٹیم کے کپتان شان مسعود نے گزشتہ روز پریس کانفرنس کرتے ہوئے کہا کہ یہاں بدلے لینے کیلئے نہیں آئے ۔
میرپور ڈھاکا میں پہلے ٹیسٹ میچ سے قبل پریس کانفرنس میں شان مسعود کا کہنا تھا کہ 2024 میں بنگلادیش نے پاکستان میں بہت اچھی کرکٹ کھیلی۔ ہم اس سیریز کا بدلہ لینے کے لیے نہیں آئے لیکن کسی بھی حریف کو کمزور نہیں لیں گے۔ ہم کوشش کریں گے کہ اچھی کرکٹ کھیلیں اور میچ میں فتح حاصل کریں۔
قومی قائد نے کہا کہ میرے خیال میں بابراعظم پاکستان کا اب تک کا بہترین بلے باز ہے، اس نے بے شمار رنز بنائے ہیں اور امید ہے کہ وہ حالیہ پی ایس ایل کی کارکردگی کو ٹیسٹ میں بھی برقرار رکھیں گے۔
دوسری جانب گزشتہ روز دونوں ملکوں کے درمیان ٹیسٹ سیریز کی ٹرافی کی رونمائی بھی کی گئی ۔ٹرافی کی رونمائی دونوں ٹیموں کے کپتانوں شان مسعود اور لٹن داس نے کی اور اس کے ساتھ تصاویر بھی بنوائیں۔
واضح رہے کہ دونوں ٹیموں کے درمیان دو ٹیسٹ میچز پر مشتمل سیریز آئی سی سی ورلڈ ٹیسٹ چیمپئن شپ کا حصہ ہے۔
