لاہور: (پاک ترک نیوز)پاکستان سپر لیگ (پی ایس ایل) کی تاریخ کی سب سے مہنگی فرنچائز خریدنے والے حمزہ مجید چوہدری ایک اوورسیز پاکستانی کاروباری شخصیت ہیں، جن کی قیادت میں او زیڈ گروپ نے سیزن 11 کے لیے سیالکوٹ ٹیم کے مالکانہ حقوق 10 سال کے لیے 185 کروڑ روپے میں حاصل کیے۔
کویت میں پیدا ہونے والے حمزہ مجید چوہدری نے 2008 میں آسٹریلیا میں تعلیم کے دوران ایک کمرے سے کاروبار کا آغاز کیا، 2019 میں او زیڈ گروپ کی بنیاد رکھی اور 2020 میں مستقل طور پر پاکستان منتقل ہوئے۔
ریئل اسٹیٹ اور تعمیرات سے وابستہ او زیڈ گروپ آج متعدد کامیاب برانڈز کا حامل ہے اور لاہور کی بلند ترین عمارت کی تعمیر بھی کر رہا ہے۔
کرکٹ سے گہری وابستگی رکھنے والے حمزہ مجید چوہدری اس سے قبل عالمی سطح پر کرکٹ ایونٹس کی اسپانسرشپ بھی کر چکے ہیں، جبکہ پی ایس ایل ٹیم کی خریداری کو پاکستان کرکٹ میں ان کی سب سے بڑی سرمایہ کاری اور اوورسیز پاکستانیوں کے بڑھتے ہوئے اعتماد کی واضح مثال قرار دیا جا رہا ہے۔
