ونڈہوک: (پاک ترک نیوز)ویسٹ انڈیز انڈر 19 ٹیم کے ہیڈ کوچ اور سابق فرسٹ کلاس کرکٹر روہن نرس نے پاکستانی ٹیم کوورلڈ کپ کے سیمی فائنل تک پہنچنے کا مضبوط امیدوار قرار دیتے ہوئے ٹیم کے تین کھلاڑیوں کو نمایاں خطرہ قرار دیا ہے۔
روہن نرس نے پاکستان کی ابھرتی ہوئی صلاحیتوں کی بھرپور تعریف کی اور اوپنرز سمیر منہاس، عمر زیب اور فاسٹ بولر محمد صیام کو خاص طور پر سراہا۔ روہن نرس کا کہنا تھا کہ پاکستان ٹیم میں سمیر منہاس، نوجوان عمر زیب اور محمد صیام جیسے باصلاحیت کھلاڑی موجود ہیں جو اس ٹورنامنٹ کو دلچسپ بنا دیں گے۔ جب ان سے سیمی فائنل تک پہنچنے والی چار ٹیموں کے بارے میں سوال کیا گیا تو انہوں نے پاکستان کو مضبوط امیدوار قرار دیا، تاہم حتمی فہرست دینے سے گریز کیا اور کہا کہ تمام ٹیموں میں بے پناہ ٹیلنٹ موجود ہے جس کی وجہ سے ٹورنامنٹ نہایت غیر متوقع اور سنسنی خیز ہوگا۔
انہوں نے مزید کہا کہ پاکستان سمیت کئی ٹیموں کے پاس فائنل تک پہنچنے کا شاندار موقع ہے، جس کی وجہ سے یہ ورلڈ کپ کرکٹ شائقین کے لیے انتہائی دلچسپ ثابت ہوگا۔
روہن نرس نے حال ہی میں منعقد ہونے والے اے سی سی مینز انڈر 19 ایشیا کپ میں پاکستان کی شاندار کارکردگی کو سراہتے ہوئے کہا کہ گرین شرٹس کی صلاحیتیں اور ٹیم کی گہرائی واضح طور پر نظر آئی۔
ان کا کہنا تھا کہ پاکستان انڈر 19 ٹیم غیر معمولی طور پر باصلاحیت ہے اور ایشیا کپ میں ان کی کارکردگی اس بات کا واضح ثبوت ہے، ٹیم میں کئی ایسے کھلاڑی موجود ہیں جو میچ کا رخ بدلنے کی صلاحیت رکھتے ہیں۔
ADVERTISEMENT
انڈر 19 ورلڈ کپ:ویسٹ انڈیز کوچ نے پاکستان کو مضبوط امیدوار قرار دیدیا
