لاہور( پاک ترک نیوز) اگر آپ یا آپ کے اہلِ خانہ اینٹی بائیوٹک، الرجی، معدے کی دوا یا کوئی انجیکشن باقاعدگی سے استعمال کرتے ہیں تو یہ اطلاع آپ کے لیے نہایت اہم ہے۔ پنجاب میں جعلی اور غیر معیاری ادویات کی موجودگی کے بعد محکمہ صحت نے عوام کے لیے ہنگامی انتباہ جاری کر دیا ہے۔
محکمہ صحت پنجاب نے 12 مختلف ادویات اور طبی مصنوعات کے مخصوص بیچز کو مشکوک قرار دیتے ہوئے ان کے خلاف الرٹ جاری کیا ہے۔
ڈرگ ٹیسٹنگ لیبارٹری کی رپورٹ کے مطابق معروف اینٹی بائیوٹک ایزومیکس کے بعض بیچز جعلی پائے گئے ہیں، جبکہ معدے کے علاج میں استعمال ہونے والی زوپینٹ دوا کے کچھ بیچز بھی ٹیسٹ میں غیر معیاری یا جعلی ثابت ہوئے ہیں۔
رپورٹ میں مزید بتایا گیا ہے کہ الرجی کے علاج میں استعمال ہونے والی پانچ مختلف کمپنیوں کی ادویات معیار پر پوری نہیں اتریں۔ اسی طرح خون کی کمی کے مریضوں کو لگایا جانے والا ایک اہم انجیکشن بھی مقررہ معیار پر پورا نہیں اتر سکا۔
مزید برآں، ہومیوپیتھک دوا بیلاڈونا میں خطرناک مقدار میں اسٹرائیڈ کی موجودگی سامنے آئی، جبکہ ڈرموٹین فیس وائٹننگ کریم میں بھی ملاوٹ کی تصدیق ہوئی ہے۔
یہ بھی پڑھیں: فضائی آلودگی اور مردانہ بانجھ پن
محکمہ صحت نے ہدایت کی ہے کہ ان تمام ادویات اور طبی مصنوعات کے متاثرہ بیچز فوری طور پر مارکیٹ سے واپس لیے جائیں، ان کی فروخت بند کی جائے اور استعمال سے گریز کیا جائے۔ اس حوالے سے اسپتالوں، ڈاکٹروں، فارماسسٹ اور میڈیکل اسٹورز کو بھی ضروری ہدایات جاری کر دی گئی ہیں۔
اگر آپ یا آپ کے کسی عزیز کے زیرِ استعمال دوا ان میں شامل ہے تو فوری طور پر اس کا بیچ نمبر چیک کریں اور اپنے معالج یا مستند فارماسسٹ سے مشورہ ضرور کریں۔ تصدیق کے بغیر ایسی دوا کا استعمال جاری رکھنے سے گریز کریں۔
