اسلام آباد(پاک ترک نیوز ) اقوام متحدہ کے سیکریٹری جنرل انتونیو گوتریس پاکستان پہنچ گئے۔ اسلام آباد آمد پر قائم مقام سیکریٹری خارجہ نبیل منیر نے معزز مہمان کا استقبال کیا۔دفتر خارجہ کے مطابق انتونیو گوتریس نائب وزیراعظم اور وزیر خارجہ اسحاق ڈار کی دعوت پر پاکستان پہنچے ہیں۔ دورے کے دوران وہ صدر مملکت، وزیراعظم شہباز شریف، نائب وزیراعظم اسحاق ڈار اور فیلڈ مارشل سے ملاقاتیں کریں گے۔اقوام متحدہ کے سیکریٹری جنرل پاک بھارت جنگ بندی کی نگرانی کرنے والے اقوام متحدہ کے فوجی مبصر گروپ کے ہیڈکوارٹرز کا دورہ بھی کریں گے۔
انتونیو گوتریس نیشنل ڈیزاسٹر مینجمنٹ اتھارٹی میں بریفنگ میں بھی شرکت کریں گے، جہاں پاکستان کی عالمی امن و سلامتی، انسانی امداد اور قدرتی آفات سے نمٹنے کی کوششوں کو اجاگر کیا جائے گا۔ترجمان دفتر خارجہ کے مطابق انتونیو گوتریس کا دورہ علاقائی اور عالمی صورتحال پر تبادلہ خیال کا اہم موقع فراہم کرے گا۔ دورے کے دوران عالمی امن اور پائیدار ترقی کے لیے اقوام متحدہ کے سیکریٹری جنرل کی قیادت اور خدمات کو بھی سراہا جائے گا۔
یہ بھی پڑھیں: مکہ دفاعی اتحاد کا ہنگامی اجلاس، پاکستان اور ترکیہ کا سعودی عرب میں مشترکہ افواج فوری تعینات کرنے کا فیصلہ
دفتر خارجہ کا کہنا ہے کہ انتونیو گوتریس کا دورہ اقوام متحدہ کے کثیرالجہتی نظام کے لیے پاکستان کی مضبوط حمایت کا عکاس ہے، پاکستان نے اقوام متحدہ کے چارٹر کے مقاصد اور اصولوں سے اپنی وابستگی کا ایک بار پھر اعادہ کیا ہے۔
