ماسکو(پاک ترک نیوز )روس کے مشرقی علاقے امور میں تربیتی پرواز کے دوران روسی فوج کا ٹی یو 95 بمبار طیارہ گر کر تباہ ہوگیا، حادثے میں عملے کے 6 ارکان ہلاک جبکہ ایک زخمی ہوگیا۔
روسی سرکاری خبر رساں ادارے تاس کے مطابق روسی وزارت دفاع نے بتایا کہ حادثہ 29 ستمبر کو امور ریجن کے ایک غیر آباد علاقے میں پیش آیا۔
وزارت دفاع کے مطابق طیارہ تربیتی پرواز پر تھا کہ اچانک حادثے کا شکار ہوگیا۔ ابتدائی اطلاعات کے مطابق طیارے میں سوار عملے کے 6 ارکان جان کی بازی ہار گئے، جبکہ ایک زخمی اہلکار کو جائے حادثہ سے نکال کر اسپتال منتقل کردیا گیا۔
روسی وزارت دفاع نے واضح کیا کہ حادثے کے وقت طیارے میں کوئی گولہ بارود یا اسلحہ موجود نہیں تھا۔
ٹی یو 95 سوویت دور میں تیار کیا گیا روس کا طویل فاصلے تک پرواز کرنے والا بڑا بمبار طیارہ ہے، جو جوہری ہتھیار لے جانے کی صلاحیت بھی رکھتا ہے۔حادثے کی وجوہات جاننے کے لیے تحقیقات شروع کردی گئی ہیں۔
