تھائی لینڈ اور کمبوڈیا کے درمیان غیر مشروط جنگ بندی پر اتفاق

کوالالمپور(پاک ترک نیوز ) تھائی لینڈ اور کمبوڈیا نے جاری سرحدی تنازع کے خاتمے کیلئے غیر مشروط جنگ بندی پر اتفاق کر لیا ہے۔
یہ معاہدہ ملائیشیا کے دارالحکومت کوالالمپور میں ہونے والے اعلیٰ سطح مذاکرات میں طے پایا۔
مذاکرات میں تھائی لینڈ کے قائم مقام وزیراعظم، کمبوڈیا کے وزیراعظم اور ملائیشین وزیراعظم انور ابراہیم شریک ہوئے، جبکہ امریکا اور چین کے سفیر بھی اس موقع پر موجود تھے۔
ملائیشین وزیراعظم انور ابراہیم نے بتایا کہ دونوں فریقین نہ صرف جنگ بندی پر متفق ہوگئے ہیں بلکہ براہ راست رابطے بحال کرنے کا بھی فیصلہ کیا ہے، امریکی صدر نے بھی دونوں ممالک کے سربراہان سے پرامن حل تلاش کرنے کی اپیل کی تھی۔
کمبوڈین وزیراعظم نے مذاکرات کو ’’حوصلہ افزا‘‘ قرار دیتے ہوئے کہا کہ مذاکرات اچھے رہے، امید ہے لڑائی فوری طور پر رک جائے گی۔
واضح رہے کہ تھائی لینڈ اور کمبوڈیا کے درمیان حالیہ سرحدی جھڑپوں میں اب تک 35 افراد ہلاک اور 3 لاکھ سے زائد افراد بے گھر ہو چکے ہیں۔