تہران (پاک ترک نیوز )العربیہ نے ذرائع کے حوالے سے دعویٰ کیا ہے کہ امریکہ اور ایران نے 60 روزہ جنگ بندی میں مزید 60 روز کی توسیع پر اتفاق کر لیا ہے۔ تاہم، دونوں ممالک کی جانب سے اس حوالے سے تاحال کوئی باضابطہ اعلان سامنے نہیں آیا۔
واشنگٹن اور تہران کے درمیان جون میں طے پانے والے مفاہمتی معاہدے کی 60 روزہ مدت آج 17 اگست کو ختم ہو رہی تھی، جبکہ وسیع تر امن معاہدے کے لیے مذاکرات ڈیڈلاک کا شکار ہیں۔
امریکی صدر ڈونلڈ ٹرمپ نے واضح کیا ہے کہ ایران کو جوہری ہتھیار حاصل کرنے سے روکنا امریکا کی اولین ترجیح ہے اور ایران کے جوہری پروگرام سے متعلق امریکی پالیسی اور مؤقف میں کوئی تبدیلی نہیں آئی۔
دوسری جانب جنگ بندی کی توسیع سے متعلق العربیہ کی رپورٹ کے باوجود ایران اور امریکا کی جانب سے اس کی باضابطہ تصدیق نہیں کی گئی، جبکہ حالیہ رپورٹس میں مذاکرات کے تعطل اور خطے میں کشیدگی برقرار رہنے کی نشاندہی کی گئی ہے۔
