بنکاک (پاک ترک نیوز) تھائی لینڈ کی ملکہ سوتھیدا نے فائٹر پائلٹ بننے کی جانب ایک اور بڑا قدم اٹھا لیا، ملکہ سورت تھانی کے ونگ 7 میں گریپن فائٹر طیارے کی پرواز کی خصوصی تربیت حاصل کر رہی ہیں۔رپورٹس کے مطابق ملکہ کی یہ نجی تربیتی مشق 20 اگست سے 4 ستمبر 2026 تک جاری رہے گی، جس میں انہیں تھائی فضائیہ کے طے شدہ تربیتی مراحل سے گزارا جائے گا اور کامیاب پیش رفت کی صورت میں وہ گریپن طیارے کی تنہا پرواز بھی کرسکتی ہیں۔
تربیت کے دوران ماہر فلائٹ انسٹرکٹرز اور ہوا بازی کے ماہرین ملکہ کی رہنمائی کر رہے ہیں۔اگر ملکہ سوتھیدا نے یہ پروگرام کامیابی سے مکمل کرلیا تو وہ فائٹر طیارہ اڑانے والی دنیا کی پہلی حکمران ملکہ بن سکتی ہیں۔گریپن فائٹر کی تربیت سے قبل ملکہ سوتھیدا نے ایل 39 ایڈوانسڈ جیٹ ٹرینر پر بھی تربیت حاصل کی، جبکہ متعدد فلائٹ سمیولیٹر سیشنز میں بھی حصہ لیا۔
وہ تھائی فضائیہ کے ونگ 7 کے کئی نجی دورے کرچکی ہیں، جہاں تھائی فضائیہ کے گریپن 39 سی/ڈی فائٹر طیاروں کا بیڑا موجود ہے۔ ان دوروں کے دوران انہوں نے طیاروں کے تکنیکی نظام کا مطالعہ کیا اور جنگی طیارے اڑانے والے پائلٹس سے بھی ملاقاتیں کیں۔ملکہ سوتھیدا کا ہوا بازی کا تجربہ بھی خاصا وسیع ہے۔ انہوں نے تھائی فضائیہ اور تھائی فوج سے مختلف ایوی ایشن کورسز مکمل کیے، جبکہ جرمنی میں بھی مزید فلائٹ ٹریننگ حاصل کی۔
یہ بھی پڑھیں: پنجاب میں 24 اگست سے اسکول کھل جائیں گے
وہ سیسنا ٹی 41، سی ٹی 4 ای اور پی سی 9 سمیت مختلف طیارے اڑا چکی ہیں، جبکہ جرمنی میں کمرشل پائلٹ لائسنس کے ساتھ بوئنگ 737 کی ٹائپ ریٹنگ بھی حاصل کرچکی ہیں۔ملکہ سوتھیدا نے تھائی سول ایوی ایشن اتھارٹی سے ایئرلائن ٹرانسپورٹ پائلٹ لائسنس بھی حاصل کیا اور شاہی بوئنگ 737 طیاروں پر بطور معاون پائلٹ خدمات انجام دے چکی ہیں۔اب ان کی تربیت کا اگلا اور سب سے مشکل مرحلہ گریپن فائٹر طیارہ ہے، جس کی کامیاب تکمیل انہیں تاریخ میں ایک منفرد مقام دلا سکتی ہے۔
