ٹیکسلا ( پاک ترک نیوز) راولپنڈی پولیس کی خصوصی ٹیم نے ٹیکسلا میں ٹک ٹاکر خاتون عائشہ کے قتل کی تحقیقات کے دوران تین مشتبہ افراد کو تحویل میں لے لیا۔
پولیس ذرائع کے مطابق تینوں مشتبہ افراد کو ٹیکسلا، اٹک اور خیبر پختونخوا کے مختلف علاقوں سے حراست میں لیا گیا۔ زیرِ حراست افراد نامزد ملزمان کاشی، کوثر اور جاوید کے قریبی عزیز ہیں اور مبینہ طور پر ان سے رابطے میں تھے۔
پولیس نے جائے وقوعہ کی جیو فینسنگ بھی مکمل کرلی ہے۔ ذرائع کے مطابق نامزد ملزمان کے موبائل فونز کی لوکیشن فائرنگ کے مقام پر نہیں آئی، جبکہ واردات کے وقت ان کے موبائل فونز کی لوکیشن مری میں موجود تھی۔
پولیس ذرائع کا کہنا ہے کہ عائشہ کے قتل کے بعد سے نامزد ملزمان کے گھروں پر تالے لگے ہوئے ہیں۔ مقتولہ کا موبائل فون بھی فرانزک تجزیے کے لیے بھجوا دیا گیا ہے۔
یہ بھی پڑھیں: سپریم کورٹ نے بانی پی ٹی آئی کے علاج پر سیاست سے روک دیا
ٹک ٹاکر عائشہ کو دو روز قبل ٹیکسلا میں فائرنگ کرکے قتل کیا گیا تھا۔ واقعے کا مقدمہ تھانہ ٹیکسلا میں درج ہے اور پولیس مزید تفتیش جاری رکھے ہوئے ہے۔
