ٹی ٹونٹی ورلڈ کپ :پاکستان کو دوسرے میچ میں کل امریکہ کا چیلنج درپیش

کولمبو (پاک ترک نیوز) پاکستان ٹی ٹونٹی ورلڈ کپ 2026کے اپنے دوسرے میچ میں کل امریکہ کے مد مقابل آئے گا ۔
پاکستان اور امریکہ کی ٹیمیں کولمبو میں ایک دوسرے کے مد مقابل آئیں گی ۔دونوں ٹیمیں اب تک ورلڈ کپ میں ایک ایک میچ کھیل چکے ہیں ۔ پاکستان نے نیدر لینڈز کو ہرایا تھا جبکہ امریکہ کو بھارت کے ہاتھوں شکست کا سامنا کرنا پڑا تھا ۔
دوسری جانب انٹرنیشنل کرکٹ کونسل نے پاکستان کو ٹی20 ورلڈ کپ 2026 میں بھارت کے خلاف میچ کھیلنے پر آمادہ کرنے کی کوششیں تیز کردی ہیں۔
اس سلسلے میں پاکستان کرکٹ بورڈ کے چیئرمین محسن نقوی اور آئی سی سی کے ڈپٹی چیئرمین عمران خواجہ نے لاہور میں چار گھنٹے تک تبادلہ خیال کیا۔
ملاقات میں نا صرف پاک بھارت میچ بلکہ عالمی اور خطے کی کرکٹ صورتحال پر بھی تفصیلی گفتگو ہوئی۔
پی سی بی کی قیادت نے حکومت سے رابطے کا فیصلہ کیا ہے اور محسن نقوی جلد وزیراعظم سے ملاقات کریں گے تاکہ بھارت کے خلاف میچ کے حوالے سے حتمی ہدایت حاصل کی جا سکے۔
پی سی بی نے آئی سی سی کو اپنے موقف اور شرائط سے آگاہ کرتے واضح کیا ہے کہ بھارت کے خلاف میچ کھیلنے یا نہ کھیلنے کا فیصلہ مکمل طور پر حکومت کی ہدایت کے مطابق ہوگا۔
ملاقات میں بنگلہ دیش کرکٹ بورڈ کے صدر امین الاسلام بھی شریک ہوئے، جنہیں پی سی بی نے یقین دہانی کرائی کہ ایونٹ میں ان کے مالی اور کھیل سے متعلق حقوق کا تحفظ کیا جائے گا۔
ذرائع کے مطابق آئی سی سی سمیت دیگر کرکٹ بورڈز چاہتے ہیں کہ پاکستان اور بھارت کا مقابلہ ہو، کیونکہ اس سے ایونٹ کی اہمیت اور آمدنی میں اضافہ ہوتا ہے۔
حالیہ تنازعات کی بنیاد بنگلہ دیش کے فاسٹ بولر مستفیض الرحمان کے آئی پی ایل اسکواڈ سے غیر متوقع ریلیز پر ہوئی، جس کے بعد بنگلہ دیش نے اپنے میچز کسی اور مقام پر منتقل کرنے کی درخواست دی تھی، تاہم آئی سی سی نے ان کے مطالبات مسترد کر دیے اور بنگلہ دیش کو ایونٹ سے باہر کر کے اسکاٹ لینڈ کو شامل کر لیا۔
پاکستان کرکٹ بورڈ نے بنگلہ دیش کی حمایت کرتے ہوئے بھارت کے خلاف میچ کے بائیکاٹ کا اعلان کیا تھا، جس کے بعد آئی سی سی کو مالی نقصانات کا خدشہ پیدا ہوا۔
اب سفارتی رابطوں اور اعلیٰ سطح مشاورت کے بعد معاملہ ایک بار پھر فیصلہ کن مرحلے میں داخل ہو چکا ہے، اور چند روز میں حتمی فیصلہ سامنے آنے کی توقع ہے۔
ذرائع کا کہنا ہے کہ آج پاک بھارت ٹی20 میچ کے حوالے سے کوئی حتمی پیش رفت متوقع نہیں ہے۔ امکان ظاہر کیا جا رہا ہے کہ اس میچ کے بارے میں فیصلہ 12 فروری کو سامنے آئے گا۔واضح رہے کہ حکومت پاکستان کی ہدایت پر پاکستان کرکٹ بورڈ نے ٹیم کو ٹی20 ورلڈ کپ میں حصہ لینے کی اجازت دی تھی، لیکن بھارت کے خلاف میچ کھیلنے سے گریز کرنے کا فیصلہ برقرار رکھا گیا ہے۔