اسلام آباد ( پاک ترک نیوز) سی ایس ایس امتحان میں شرکت کے لیے عمر کی بالائی حد 30 سے بڑھا کر 35 سال کرنے اور امتحان دینے کے مواقع 3 سے بڑھا کر 5 کرنے کی سفارش مسترد کردی گئی۔ذرائع کے مطابق قائمہ کمیٹی کی ذیلی کمیٹی نے سی ایس ایس امیدواروں کی عمر کی حد 30 سے بڑھا کر 35 سال کرنے کی سفارش کی تھی، جبکہ قائمہ کمیٹی کابینہ سیکریٹریٹ نے امتحان میں شرکت کے مواقع 3 سے بڑھا کر 5 کرنے کی تجویز دی تھی۔
اسٹیبلشمنٹ ڈویژن نے موجودہ پالیسی برقرار رکھنے کا فیصلہ کرتے ہوئے قائمہ کمیٹی کی ذیلی کمیٹی کی سفارشات کو ناقابلِ عمل قرار دے دیا ہے۔ پارلیمانی کمیٹی کو سی ایس ایس سے متعلق پالیسی پر اسٹیبلشمنٹ ڈویژن کے تحریری مؤقف سے بھی آگاہ کردیا گیا ہے۔اسٹیبلشمنٹ ڈویژن کے مطابق سی ایس ایس کے لیے عمر کی حد یا امتحان میں شرکت کے مواقع بڑھانے کا فیصلہ وفاقی حکومت کے پالیسی دائرہ اختیار میں آتا ہے، جبکہ ایف پی ایس سی وفاقی حکومت کی منظور شدہ پالیسی پر عمل درآمد کرتا ہے۔
یہ بھی پڑھیں: نجی شعبے کی سرمایہ کاری معاشی ترقی کے لیے اہم ہے، وزیر خزانہ
مؤقف میں بتایا گیا ہے کہ ایف پی ایس سی کے 174ویں اجلاس میں موجودہ پالیسی برقرار رکھنے کا فیصلہ کیا گیا۔اسٹیبلشمنٹ ڈویژن کے مطابق عمر کی حد بڑھانے سے سی ایس ایس امتحان میں امیدواروں کی تعداد میں نمایاں اضافہ ہوسکتا ہے، جس کے نتیجے میں امتحان کے انعقاد اور پیپرز کی جانچ کا بوجھ بڑھے گا۔مؤقف میں مزید کہا گیا کہ امیدواروں کو زیادہ مواقع دینے سے بعض افراد بار بار امتحان میں شرکت کرتے ہوئے اپنے پیداواری سال ضائع کرسکتے ہیں۔
اسٹیبلشمنٹ ڈویژن کے مطابق زیادہ عمر میں سول سروس میں آنے والے افسران کی مدتِ ملازمت کم ہوسکتی ہے، جبکہ اعلیٰ عہدوں کے لیے تجربہ کار افسران کی طویل المدتی دستیابی بھی متاثر ہونے کا خدشہ ہے۔
