اسلام آباد ( پاک ترک نیوز) آزاد کشمیر انتخابات کیلئے سیاسی جماعتوں کی انتخابی مہم میں تیزی آ گئی ،مسلم لیگ (ن) کا اعلیٰ سطحی وفد میرپور پہنچ گیا،وفاقی وزیر رانا ثناء اللہ، وفاقی وزیر امور کشمیر انجینئر امیر مقام اور ڈاکٹر طارق فضل چوہدری میرپور پہنچے۔
ذرائع کے مطابق وفاقی وزراء میرپور ڈویژن سے مسلم لیگ (ن) کے امیدواروں سے اہم ملاقاتیں کریں گے، 13 حلقوں کے امیدواروں سے انتخابی حکمت عملی پر مشاورت ہوگی،ٹکٹوں کی تقسیم پر تحفظات رکھنے والے رہنماؤں سے وفاقی وزراء کی الگ ملاقاتیں بھی متوقع ہیں۔
ذرائع کے مطابق ناراض رہنماؤں کو پارٹی امیدواروں کے حق میں دستبردار ہونے پر آمادہ کرنے کی کوشش کی جائے گی، ملاقاتوں کے بعد متعدد آزاد امیدوار مسلم لیگ (ن) کے حق میں انتخاب سے دستبردار ہو سکتے ہیں ۔
یہ بھی پڑھیں: آزاد کشمیر کے امن کو تباہ کرنے والوں کے گرد گھیرا تنگ
اجلاس میں چودھری طارق فاروق، چوہدری محمد سعید، چوہدری رخسار، چوہدری محمد رزاق، کرنل (ر) وقار احمد نور، راجہ ایاز نثار، چوہدری اظہر صادق، عظیم بخش، راجہ آصف سمیت دیگر امیدوار شریک ہوں گے۔
ناراض رہنماؤں میں راجہ شاداب، شعیب عابد سمیت دیگر امیدواروں سے بھی وفاقی وزراء کی اہم ملاقاتوں کا امکان ہے، مسلم لیگ (ن) کی قیادت میرپور ڈویژن میں انتخابی اتحاد اور پارٹی نظم و ضبط مضبوط بنانے کے لیے سرگرم ہوگئی،قائد مسلم لیگ ن محمد نواز شریف کے انتخابی دروہ میرپور کے حوالے سے بھی مشاورت کی جائے گی۔
