نیشنل سیونگزکے منافع کی شرح میں اضافے کا اعلان

اسلام آباد ( پاک ترک نیوز) حکومت نے نیشنل سیونگز اسکیموں اور سروا اسلامی اسکیموں پر منافع کی شرحوں میں اضافہ کر دیا۔
نوٹیفکیشن کے مطابق اسپیشل سیونگز سرٹیفکیٹ/اکاؤنٹ پر پہلے پانچ منافع کی ادائیگیوں کے لیے سالانہ منافع کی شرح 11.6 فیصد مقرر کی گئی ، جبکہ آخری ادائیگی پر 12.4 فیصد سالانہ منافع دیا جائے گا۔
اسی طرح شارٹ ٹرم سیونگز سرٹیفکیٹس کی منافع کی شرحوں میں بھی اضافہ کیا گیا ۔ تین ماہ، چھ ماہ اور ایک سالہ مدت کے لیے بالترتیب 10.84 فیصد، 10.58 فیصد اور 11.23 فیصد سالانہ منافع مقرر کیا گیا ہے۔سیونگز اکاؤنٹ پر منافع کی شرح 10 فیصد سالانہ مقرر کی گئی ہے۔
تاہم ڈیفنس سیونگز سرٹیفکیٹس، بہبود سیونگز سرٹیفکیٹس، پنشنرز بینیفٹ اکاؤنٹ اور شہداء فیملی ویلفیئر اکاؤنٹ کی منافع کی شرحوں میں کوئی تبدیلی نہیں کی گئی، اور ان پر بدستور 12 فیصد سالانہ منافع دیا جائے گا۔دوسری جانب سروا اسلامک ٹرم اکاؤنٹ اور سروا اسلامک سیونگز اکاؤنٹ کی منافع کی شرحوں میں بھی اضافہ کیا گیا ہے۔
ایک سالہ سروا اسلامک ٹرم اکاؤنٹ پر متوقع سالانہ منافع 10.93 فیصد جبکہ پانچ سالہ اکاؤنٹ پر متوقع سالانہ منافع 11.16 فیصد مقرر کیا گیا ہے۔