اسلام آباد ( پاک ترک نیوز) وزیراعظم شہباز شریف نے اپوزیشن کو ایک بار پھر مذاکرات کی دعوت دے دی۔ وفاقی کابینہ کے اجلاس میں اظہار خیال کرتے ہوئے وزیراعظم نے کہا کہ حکومت اپوزیشن سے مذاکرات کے لیے تیار ہے، تاہم مذاکرات کی میز پر آنا اپوزیشن پر منحصر ہے۔ وزیراعظم نے کہا کہ تالی دونوں ہاتھوں سے بجتی ہے۔ دوسری جانب ڈیزل کی قیمت میں کمی کو خوش آئند قرار دیتے ہوئے انہوں نے کہا کہ حکومت کی ہر ممکن کوشش ہے کہ عالمی سطح پر تیل کی بڑھتی قیمتوں کا بوجھ عوام پر منتقل نہ کیا جائے۔
وزیراعظم شہباز شریف کی زیر صدارت وفاقی کابینہ کا اجلاس ہوا، جس میں ملکی سیاسی اور معاشی صورتحال سمیت مختلف اہم امور کا جائزہ لیا گیا۔اجلاس میں اظہار خیال کرتے ہوئے وزیراعظم نے ایک بار پھر اپوزیشن کو مذاکرات کی دعوت دے دی۔ شہباز شریف نے کہا کہ حکومت اپوزیشن سے مذاکرات کے لیے تیار ہے۔ان کا کہنا تھا کہ تالی دونوں ہاتھوں سے بجتی ہے، اب یہ اپوزیشن پر منحصر ہے کہ وہ مذاکرات کی میز پر کب آتی ہے۔
دوسری جانب وزیراعظم نے ڈیزل کی قیمت میں کمی کو بھی خوش آئند قرار دیا۔شہباز شریف نے کہا کہ حکومت کی ہر وقت کوشش ہوتی ہے کہ عام آدمی کو ریلیف فراہم کیا جائے۔ان کا کہنا تھا کہ عالمی سطح پر تیل کی قیمتوں میں اضافے کا بوجھ عوام پر منتقل نہ کرنے کی کوشش کی گئی۔وزیراعظم نے بتایا کہ حکومت نے مشکل معاشی حالات میں عوام کو ریلیف دینے کے لیے 128 ارب روپے مختص کیے ہیں۔انہوں نے کہا کہ عالمی منڈی میں تیل کی قیمتوں میں اتار چڑھاؤ اور خطے کی صورتحال کے باعث تیل کی سپلائی میں مشکلات پیدا ہو رہی ہیں۔خطے میں کشیدگی کے اثرات پاکستان سمیت پورے خطے کی معیشت پر مرتب ہو سکتے ہیں۔
یہ بھی پڑھیں: وزیر اعظم کی زیر صدارت وفاقی کابینہ کا اہم اجلاس آج ہوگا
شہباز شریف نے کہا کہ خطے کی صورتحال میں بہتری پاکستان کی معیشت کے لیے بھی اہم ہے۔ان کے مطابق معاشی استحکام اور بہتری کے لیے خطے میں امن اور حالات کا بہتر ہونا ضروری ہے۔وزیراعظم نے امید ظاہر کی کہ جیسے ہی خطے کی صورتحال بہتر ہوگی، پاکستان کی معیشت کو بھی استحکام حاصل ہوگا اور معاشی سرگرمیوں میں مزید بہتری آئے گی۔
وزیراعظم نے اس عزم کا اظہار کیا کہ حکومت مشکل حالات کے باوجود عوام کو ریلیف دینے اور معیشت کو مستحکم کرنے کے لیے اپنی کوششیں جاری رکھے گی۔
