مدینہ منورہ ائرپورٹ روڈ کو ولی عہد کے نام سے موسوم کر دیا گیا

ریاض (پاک ترک نیوز)
خادم حرمین شریفین شاہ سلمان بن عبدالعزیز آل سعود نے مدینہ منورہ کی ایئرپورٹ روڈ کو ولی عہد ’شہزادہ محمد بن سلمان بن عبدالعزیز‘ سے موسوم کرنے کا شاہی فرمان جاری کردیا ہے۔
سعودیعرب کے سرکاری میڈیا کے مطابق شاہی فرمان کےاجرا پر گورنر مدینہ منورہ اور شہرِ مقدس کی ترقیاتی اتھارٹی بورڈ کے چیئرمین شہزادہ سلمان بن سلطان بن عبدالعزیز نے خادم حرمین شریفین شاہ سلمان بن عبدالعزیز آل سعود کا شکریہ ادا کرتے ہوئے مملکت کی سطح پر شاندار ترقی اور مثالی منصوبوں کے اجرا پر ولی عہد شہزادہ محمد بن سلمان بن عبدالعزیز آل سعود کے مثالی خدمات کے تناظر میں مدینہ منورہ کی اہم ترین شاہراہوں میں سے ایک کو ولی عہد کے نام سے موسوم کرنے کی ستائش کی ہے۔
’شہزادہ محمد بن سلمان بن عبدالعزیز‘ شاہراہ مدینہ منورہ کی ایک مرکزی اور اسٹراٹیجک حثیت کی حامل ہے۔یہ طویل سڑک مسجدِ نبویؐ کو شاہ سلمان بن عبدالعزیز روڈ سے ملاتی ہے جو شہزادہ محمد بن عبدالعزیز انٹرنیشنل ایئرپورٹ اور رائل ٹرمینل کی طرف جاتی ہے۔
یہ شاہراہ 13 کلو میٹر طویل ہے جو اہم اور مرکزی شاہراہوں سے ہوتی ہوئی گزرتی ہے جن میں شاہ فیصل بن عبدالعزیز (رنگ روڈ نمبر1) شاہ عبداللہ بن عبدالعزیز (رنگ روڈ نمبر2) اور شاہ خالد بن عبدالعزیز (رنگ روڈ نمبر3 ) شامل ہیں۔