لاہور( پاک ترک نیوز) لاہور ڈویلپمنٹ اتھارٹی نے شہر بھر میں غیرقانونی ہاؤسنگ اسکیموں اور غیرمجاز کمرشل عمارتوں کے خلاف بڑا کریک ڈاؤن کرتے ہوئے 14 غیرقانونی ہاؤسنگ اسکیموں کے خلاف کارروائی کی، جبکہ 73 کمرشل املاک کو سیل کر دیا۔
ایل ڈی اے کے ترجمان کے مطابق یہ کارروائی ڈائریکٹر جنرل ایل ڈی اے طاہر فاروق کی ہدایت پر کی گئی۔ میٹروپولیٹن پلاننگ ونگ اور ٹاؤن پلاننگ کی ٹیموں نے منہالہ روڈ، چھاپہ ولیج روڈ اور معراج روڈ پر قائم متعدد غیرقانونی ہاؤسنگ اسکیموں کے خلاف آپریشن کیا۔
کارروائی کی زد میں آنے والی اسکیموں میں الکبیر گارڈن، عمار ایونیو، کینال ویو فارمز، آیان سٹی فیز ون اور ٹو، علی گارڈن، گرینڈ بازار/کشمیر گارڈن، نیو نتھوکی آبادی، احمد گارڈن، پاک ہومز، مغل ہومز، سلیمان سٹی/ہیون سٹی، الحامد میڈوز، رائل ولاز اور بی ایم اسٹیٹ/محافظ سٹی شامل ہیں۔
ترجمان کے مطابق آپریشن کے دوران ان اسکیموں میں قائم غیرقانونی سڑکیں، باؤنڈری والز، سیوریج سسٹم اور دیگر انفراسٹرکچر مسمار کر دیا گیا، جبکہ سائٹ دفاتر بھی سیل کر دیے گئے۔
دوسری جانب گلبرگ، فیصل ٹاؤن، نیو مسلم ٹاؤن، سمن آباد اور علامہ اقبال ٹاؤن میں رہائشی پلاٹوں پر غیرقانونی کمرشل سرگرمیوں کے خلاف کارروائی کرتے ہوئے 73 املاک کو سیل کیا گیا۔
یہ بھی پڑھیں: کراچی میں رینجرز کیمپ پر حملے کی منصوبہ بندی افغانستان میں کی گئی
سیل کی جانے والی املاک میں نجی اسکول، میڈیکل اسٹورز، کلینکس، کریانہ اسٹورز، کیفے، ریسٹورنٹس، فوڈ آؤٹ لیٹس، آٹو ورکشاپس، دکانیں اور دفاتر شامل ہیں۔
ایل ڈی اے کے مطابق گلبرگ اور فیصل ٹاؤن میں 29، نیو مسلم ٹاؤن اور سمن آباد میں 29 جبکہ علامہ اقبال ٹاؤن میں 15 کمرشل املاک کو سیل کیا گیا۔
یہ آپریشن چیف میٹروپولیٹن پلانر اور چیف ٹاؤن پلانر ون اسد الزمان کی نگرانی میں کیا گیا۔ ایل ڈی اے کا کہنا ہے کہ غیرقانونی ہاؤسنگ اسکیموں اور لینڈ یوز قوانین کی خلاف ورزی کے خلاف کارروائیاں آئندہ بھی بلاامتیاز جاری رہیں گی۔
