لاہور( پاک ترک نیوز) پٹرولیم لیوی کے خلاف جماعت اسلامی کے چھٹے روز دھرنے جاری ہیں ،آج کراچی میں گورنر ہاؤس کے باہر بڑا جلسہ ہو گا،امیر جماعت اسلامی پاکستان حافظ نعیم الرحمٰن خطاب کریں گے۔
جماعت اسلامی نے حکومت سے پیٹرولیم لیوی ختم کرنے اور پیٹرول کی قیمت 225 روپے فی لیٹر مقرر کرنے کا مطالبہ کیا ہے۔جماعت اسلامی کا کہنا ہے کہ عوام پہلے ہی مہنگائی کے بوجھ تلے دبے ہوئے ہیں، اس لیے حکومت کو عوام پر مزید ٹیکسوں کا بوجھ ڈالنے کے بجائے ریلیف فراہم کرنا چاہیے۔
مظاہرین کی جانب سے آئی پی پیز کے معاہدے ختم کرنے اور بجلی کی قیمتوں میں کمی کا بھی مطالبہ کیا جا رہا ہے۔امیر جماعت اسلامی کراچی کے مطابق مطالبات کی منظوری تک دھرنا جاری رہے گا۔ جماعت اسلامی نے شہریوں سے اپیل کی ہے کہ وہ اپنے اہل خانہ کے ہمراہ آج کے جلسے میں شرکت کریں۔
یہ بھی پڑھیں: حکومت لیوی ختم کرے ورنہ احتجاج کا دائرہ وسیع کریں گے: حافظ نعیم
جماعت اسلامی کے مطابق جلسے میں مختلف شعبہ ہائے زندگی سے تعلق رکھنے والے افراد کی بڑی تعداد کی شرکت متوقع ہے، جبکہ دھرنے کے باعث گورنر ہاؤس کے اطراف سکیورٹی اور ٹریفک کے خصوصی انتظامات کیے جانے کا امکان ہے۔
