لاہور( پاک ترک نیوز) اداکار جمیل فخری کو بچھڑے پندرہ برس بیت گئے ،ورسٹائل اداکار جمیل فخری انیس سو چوالیس میں لاہور میں پیدا ہوئے ، فنی کیریئر کا آغاز تھیٹر سے کیا ،پھر ٹی وی سے منسلک ہو گئے، جمیل فخری نے 60کی دہائی کے اوائل میں اداکاری کی میں قدم رکھا اور مرتے دم تک لوگوں میں خوشیاں تقسیم کرتے رہے۔
جمیل فخری کو ڈرامہ سیریل اندھیرا اجالا نے شہرت کی بلندیوں تک پہنچایا، ڈرامہ دلدل، تانے بانے، وارث، بندھن، ایک محبت سو افسانے اور اندھیرا اجالا میں ان کا کردار سپر ہٹ ثابت ہوا ،جمیل فخری نے پچاس سے زائد فلموں میں بھی کام کیا۔
جمیل فخری کو 2002 میں صدارتی تمغہ حسن کارکردگی سے نوازا گیا جبکہ 1981 میں فلم "یہ زمانہ اور ہے” میں بہترین مزاحیہ اداکاری پر نگار ایوارڈ بھی دیا گیا۔
جمیل فخری دیار غیر میں اپنے جواں سالہ بیٹے کی موت کے غم میں اندر ہی اندر گھلتے رہے۔جس کے نتیجے میں ان پر فالج کا حملہ ہوا اور وہ جانبر نہ ہو سکے اور9جون2011ءکو اپنے خالق حقیقی سے جا ملے۔
