جنیوا(پاک ترک نیوز ) پاکستان کے سیاحتی مقامات، ثقافت اور قدرتی حسن کو دنیا بھر میں متعارف کرانے والی آئرش نژاد معروف مصنفہ اور سیاحتی رہنما آئزوبل شا 83 برس کی عمر میں سوئٹزرلینڈ میں انتقال کرگئیں۔آئزوبل شا کا انتقال 11 نومبر کو سوئٹزرلینڈ کے علاقے سینٹ سرگ میں واقع ان کی رہائش گاہ پر ہوا۔ وہ 1978 میں پہلی مرتبہ پاکستان آئی تھیں، جب ان کے شوہر رابرٹ شا کو فورڈ فاؤنڈیشن کے نمائندے کی حیثیت سے اسلام آباد تعینات کیا گیا تھا۔
اسلام آباد میں تین سالہ قیام کے دوران انہوں نے اردو زبان سیکھی اور ہیلری ایڈمسن کے ساتھ مل کر پاکستان پر سیاحتی رہنما کتاب لکھی، جو 1981 میں اسلام آباد سے شائع ہوئی۔ یہ پاکستان کے بارے میں جدید طرز کی ابتدائی سیاحتی کتابوں میں شمار ہوتی ہے۔ان کی کتاب پاکستان ہینڈ بک 1989 میں شائع ہوئی اور تھامس کک ٹریول اینڈ گائیڈ بک ایوارڈز کے لیے مختصر فہرست میں شامل ہوئی۔ پاکستان کے بارے میں ان کی تصویری رہنما کتاب کے پانچ ایڈیشن شائع ہوئے۔آئزوبل شا نے اپنے بیٹے بین شا کے ساتھ مل کر 1993 میں پاکستان میں پہاڑی سیاحت سے متعلق رہنما کتاب بھی تحریر کی، جبکہ قراقرم اور ہندوکش کے پہاڑی سلسلوں پر ان کی ایک اور کتاب 2013 میں لاہور سے شائع ہوئی۔
یہ بھی پڑھیں: برازیل میں امریکا کی بلند ترین عمارت سے بھی اونچا رہائشی ٹاور
انہوں نے 1990 کی دہائی میں حکومت پاکستان کے لیے سیاحت کے شعبے میں مشیر کی حیثیت سے بھی خدمات انجام دیں اور 1993 میں کراچی میں منعقدہ پاکستان ٹورازم کنونشن سے کلیدی خطاب کیا۔2005 کے زلزلے کے بعد انہوں نے متاثرین کے علاج، خصوصاً ہڈیوں اور جوڑوں کی طبی سہولیات کے لیے فنڈز جمع کرنے کی غرض سے مختلف تقاریب اور اجتماعات سے خطاب کیا۔ اسی سال لندن میں پاکستان سوسائٹی نے پاکستان کے بارے میں برطانیہ میں آگاہی اور معلومات کے فروغ کے لیے ان کی خدمات کا اعتراف کرتے ہوئے انہیں اعزاز سے نوازا۔
ان کی آخری کتاب 2013 میں لاہور کے اشاعتی ادارے وینگارڈ بکس نے شائع کی۔ اسی سال 70 برس کی عمر میں انہوں نے دوبارہ چترال کا دورہ بھی کیا۔آئزوبل شا 1943 میں آئرلینڈ کے علاقے میتھ میں پیدا ہوئیں اور کیمبرج یونیورسٹی کے نیونہم کالج سے تعلیم حاصل کی۔ وہ 1981 سے جنیوا کے قریب مقیم تھیں۔ پسماندگان میں تین بچے، نو پوتے پوتیاں اور نواسی نواسے جبکہ ایک پڑنواسی شامل ہیں۔









