اسلام آباد ( پاک ترک نیوز) پاکستان میں ترسیلاتِ زر میں اضافے پر بینکوں کو دی جانے والی مالی مراعات ختم کر دی گئی ہیں۔ اسٹیٹ بینک آف پاکستان نے آئی ایم ایف کے تحفظات کے بعد دو اہم مراعاتی اسکیمیں بند کرنے کا اعلان کر دیا۔
اسٹیٹ بینک کی جانب سے جاری سرکلر کے مطابق سوہنی دھرتی ریمیٹنس پروگرام کو یکم جولائی 2026 سے ختم کر دیا گیا ہے، جس کے بعد بینکوں اور ترسیلات بھیجنے والوں کو اس پروگرام کے تحت مزید ریوارڈ پوائنٹس نہیں دیے جائیں گے۔
اسٹیٹ بینک نے واضح کیا کہ 30 جون 2026 تک ہونے والی اہل ترسیلات پر ریوارڈ پوائنٹس جاری کیے جائیں گے، جبکہ اس تاریخ تک جمع ہونے والے پوائنٹس 30 جون 2027 تک استعمال کیے جا سکیں گے۔ اس کے بعد یکم جولائی 2027 سے یہ پروگرام مکمل طور پر غیر فعال کر دیا گیا۔
اسی طرح اسٹیٹ بینک نے ٹیلی گرافک ٹرانسفر چارجز انسینٹو اسکیم (TTCIS) بھی یکم جولائی 2026 سے ختم کرنے کا اعلان کیا ہے۔
یہ بھی پڑھیں: تنخواہ دار طبقے کیلئے ٹیکس ریلیف کی تجویز، آئی ایم ایف منظوری کا انتظار
تاہم مرکزی بینک نے ہدایت کی ہے کہ مجاز ڈیلرز اس بات کو یقینی بنائیں کہ بیرون ملک سے پاکستان بھیجی جانے والی ترسیلاتِ زر پر بھیجنے والے یا وصول کرنے والے سے کوئی فیس وصول نہ کی جائے، تاکہ اوورسیز پاکستانیوں کو مفت ترسیلات کی سہولت برقرار رہے۔
