لاہور( پاک ترک نیوز) پاکستانی عوام کو ملنے والےمہنگے پٹرول کی اصل قیمت کیا ہے ،سن کر آپ حیران ہو جائیں گے ،پیٹرول کی قیمت آخر بنتی کیسے ہے؟ اگر آپ سمجھتے ہیں کہ پیٹرول کے لیے ادا کی جانے والی پوری رقم صرف تیل کی قیمت ہے، تو ایسا نہیں ہے۔ دیکھتے ہیں یہ رپورٹ
سرکاری اعداد و شمار کے مطابق پیٹرول کی بنیادی قیمت 178 روپے 77 پیسے فی لیٹر ہے، جبکہ صارفین سے وصول کی جانے والی قیمت 297 روپے 53 پیسے فی لیٹر ہے۔یعنی ایک لیٹر پیٹرول پر تقریباً 119 روپے مختلف مدات میں وصول کیے جا رہے ہیں۔
اس رقم میں پٹرولیم لیوی، دیگر حکومتی محصولات، آئل مارکیٹنگ کمپنیوں اور ڈیلرز کے مارجن سمیت تقسیم اور ترسیل سے متعلق اخراجات شامل ہیں۔
اسی طرح ہائی اسپیڈ ڈیزل پر بھی 110 روپے 65 پیسے فی لیٹر ٹیکس، لیوی اور مختلف مارجنز کی مد میں شامل کیے جاتے ہیں۔
سادہ الفاظ میں اگر موجودہ قیمت کو دیکھا جائے تو صارف کی ادا کردہ رقم کا تقریباً 60 فیصد پیٹرول کی بنیادی قیمت جبکہ 40 فیصد مختلف ٹیکسوں، لیوی اور مارجنز پر مشتمل ہے۔
یہ بھی پڑھیں: پٹرول مہنگا کیوں؟حکومت ایک لٹر پر کتنا کماتی ہے
ماہرین کے مطابق پاکستان میں پیٹرول کی قیمت صرف عالمی منڈی میں خام تیل کی قیمت سے طے نہیں ہوتی بلکہ اس میں حکومتی ٹیکس، پٹرولیم لیوی، درآمدی اخراجات، روپے کی قدر اور سپلائی چین کے اخراجات بھی شامل ہوتے ہیں۔
اسی لیے بین الاقوامی مارکیٹ میں خام تیل سستا ہونے کے باوجود مقامی سطح پر پیٹرول کی قیمت میں اسی تناسب سے کمی دیکھنے میں نہیں آتی۔
ماہرین کا کہنا ہے کہ جب تک ٹیکسوں، لیوی اور دیگر اخراجات کی شرح میں تبدیلی نہیں آتی، عالمی منڈی میں تیل کی قیمت کم ہونے کا پورا فائدہ صارفین تک پہنچنا مشکل رہے گا۔
