اسلام آباد ( پاک ترک نیوز) آئندہ وفاقی بجٹ میں حکومت نے دکانداروں اور ریٹیلرز کو ٹیکس نیٹ میں لانے کے لیے ایک نئی فکسڈ ٹیکس اسکیم متعارف کرانے کا فیصلہ کرلیا ہے فیڈرل بورڈ آف ریونیو کے ذرائع کے مطابق یہ اسکیم ملک بھر میں نافذ کی جائے گی جس کا مقصد ریٹیل سیکٹر میں ٹیکس ادائیگی کو یقینی بنانا ہے۔
ذرائع کے مطابق مجوزہ فکسڈ ٹیکس اسکیم کو حتمی منظوری کے لیے آئندہ ہفتے انٹرنیشنل مانیٹری فنڈ کے سامنے پیش کیا جائے گا، جہاں ٹیکس اصلاحات اور محصولات سے متعلق مذاکرات ہوں گے۔
مجوزہ اسکیم کے تحت ایسے ریٹیلرز جن کا سالانہ کاروباری ٹرن اوور 20 کروڑ روپے تک ہوگا، انہیں ٹیکس حکام کے ساتھ رجسٹریشن کرانا لازمی ہوگا۔
ذرائع کا کہنا ہے کہ اس اسکیم کے تحت آنے والے دکانداروں کو سالانہ 20 کروڑ روپے تک کے کاروبار پر ایک فیصد فکسڈ ٹیکس ادا کرنا ہوگا۔
ایف بی آر کے ذرائع نے مزید بتایا کہ چھوٹے تاجروں اور دکانداروں کی سہولت کے لیے پوری اسکیم اردو زبان میں تیار کی گئی ہے تاکہ وہ ٹیکس قوانین کو آسانی سے سمجھ سکیں اور ان پر عملدرآمد کرسکیں۔
دکانداروں پر نئی فکسڈ ٹیکس اسکیم متعارف کرانے کا فیصلہ
