اسلام آباد ( پاک ترک نیوز) ایشیا ئی ترقیاتی بینک نے ایشیائی معیشت سے متعلق رپورٹ جاری کر دی ،رپورٹ میں پاکستان کی معاشی ترقی کے امکانات پر اظہار تشویش کیا گیا۔
ایشیائی بینک کی رپورٹ کے مطابق پاکستان میں رواں مالی سال معاشی شرح نمو 4 فیصد ہدف سے کم رہنے کا امکان ہے،اے ڈی بی نے پاکستان میں مہنگائی بڑھنے کا خدشہ ظاہر کرتے ہوئے اوسط شرح 8.3 فیصد تک پہنچنے کی پیش گوئی کی ہے۔
ایشیائی ترقیاتی بینک کے مطابق پاکستان میں معاشی دباؤ برقرار رہ سکتا ہے،رپورٹ میںجنوبی ایشیا میں معاشی ترقی کا مجموعی تخمینہ 6 فیصد لگایا گیا، پاکستان کی شرح نمو خطے کے دیگر ممالک سے کم رہنے کا امکان ہے ۔
رپورٹ کے مطابق بھارت 6.6 فیصد معاشی شرح نمو کے ساتھ جنوبی ایشیا میں پہلے نمبر پر،بھوٹان جنوبی ایشیا میں معاشی ترقی کے لحاظ سے دوسرے نمبر پر ہے ،سری لنکا کی معاشی شرح نمو 4 فیصد رہنے کی پیش گوئی کی گئی ہے۔
رپورٹ کے مطابق نیپال کی معاشی ترقی 3.9 فیصد، افغانستان کی 2.3 فیصد رہنے کا امکان ہے،مالدیپ کی معاشی ترقی کی شرح ایک فیصد رہنے کی پیش گوئی کی گئی ہے۔
ایشیائی ترقیاتی بینک کے مطابق جنوبی ایشیا کی معاشی کارکردگی داخلی اصلاحات، سرمایہ کاری اور برآمدات سے متاثر ہوگی، عالمی معاشی حالات کے باوجود جنوبی ایشیا میں ترقی کا رجحان برقرار رہنے کی توقع ہے۔
یہ بھی پڑھیں: پنجاب کے رہائشی علاقوں میں قائم غیر قانونی صنعتی یونٹس ہٹانے کا فیصلہ
ایشیائی ترقیاتی بینک نے پاکستان کیلئے معاشی اہداف کے حصول میں چیلنجز کی نشاندہی کر دی، پاکستان میں مہنگائی اور کم معاشی نمو آئندہ مالی سال کے اہم چیلنجز رہیں گے،معاشی استحکام کیلئے اصلاحات اور سرمایہ کاری میں اضافہ ضروری ہے۔
