کراچی ( پاک ترک نیوز) برطانیہ کی تحقیقاتی ایجنسی نیشنل کرائم ایجنسی (این سی اے) کی درخواست پر نیشنل سائبر کرائم انویسٹی گیشن ایجنسی (این سی سی آئی اے) نے کارروائی کرتے ہوئے 14 سالہ برطانوی لڑکی کو سوشل میڈیا ایپس کے ذریعے ہراساں کرنے کے الزام میں ملزم وقار احمد کو گرفتار کرلیا۔
ایڈیشنل ڈائریکٹر این سی سی آئی اے طارق نواز کے مطابق ملزم کا تعلق لاڑکانہ سے ہے، جسے قمبر شہداد کوٹ سے گرفتار کیا گیا۔ ملزم پر الزام ہے کہ وہ سوشل میڈیا ایپس کے ذریعے برطانوی کم عمر لڑکی کو فحش تصاویر بھیجتا تھا۔ ملزم کے خلاف مقدمہ درج کرکے مزید قانونی کارروائی جاری ہے۔
یہ بھی پڑھیں: لاہور قلندرز کے پی ڈی پی کھلاڑی دورہ زمبابوے کے لیے روانہ، محسن نقوی کی تقریب میں شرکت
دوسری جانب لاہور میں بھی این سی سی آئی اے نے کارروائی کرتے ہوئے کم عمر بچوں کو سوشل میڈیا پر بلیک میل کرنے کے الزام میں 25 سالہ ملزم حمیر ولایت کو گرفتار کرلیا۔این سی سی آئی اے کی ٹیم نے شالیمار ٹاؤن میں پاکستان منٹ کے قریب کارروائی کی۔ حکام کے مطابق ملزم کم عمر بچوں سے نجی مواد حاصل کرکے اسے فحش ویب سائٹس پر فروخت کرنے کی دھمکیاں دیتا تھا۔کارروائی کے دوران ملزم کے قبضے سے آئی فون 12 اور آئی فون 13 پرو برآمد کیے گئے۔ حکام کے مطابق ملزم کے ٹک ٹاک اکاؤنٹ سے بچوں کو بلیک میل کرنے اور مالی مفاد حاصل کرنے کے شواہد بھی ملے ہیں۔تفتیش کے دوران متعدد ای میل اکاؤنٹس، پاس ورڈز اور حذف شدہ اسنیپ چیٹ اکاؤنٹ کی لاگ اِن تفصیلات بھی سامنے آئی ہیں۔واقعے کا مقدمہ انسپکٹر عاقب علی خان کی مدعیت میں پریوینشن آف الیکٹرانک کرائمز ایکٹ (پیکا) اور پاکستان پینل کوڈ کی متعلقہ دفعات کے تحت درج کرکے تفتیش شروع کردی گئی ہے۔
ایڈیشنل ڈائریکٹر این سی سی آئی اے لاہور زون عاطف نے کہا ہے کہ بچوں کو آن لائن ہراساں اور بلیک میل کرنے والے عناصر کے خلاف سخت کارروائی کی جائے گی۔
