لاہور( پاک ترک نیوز) نیٹ فلکس نے اکتوبر 2026 کے لیے نئی فلموں کی فہرست جاری کردی ہے، جس کے مطابق رواں ماہ تقریباً 70 فلمیں نیٹ فلکس کی لائبریری میں شامل کی جائیں گی۔فلموں کے انتخاب میں معروف فلمی جائزہ ویب سائٹ ’’روٹن ٹماٹوز‘‘ کی درجہ بندی کو بنیاد بنایا گیا ہے۔ فہرست میں شامل پانچ بہترین فلموں کی تنقیدی درجہ بندی 92 فیصد یا اس سے زیادہ ہے۔فہرست میں پانچویں نمبر پر 2013 کی فلم ’’ڈیلاس بائرز کلب‘‘ شامل ہے۔ فلم حقیقی واقعات پر مبنی ہے اور اس میں میتھیو میک کوناہے نے مرکزی کردار ادا کیا ہے۔ کہانی ایک ایسے شخص کے گرد گھومتی ہے جسے ایڈز کی تشخیص کے بعد انتہائی کم وقت زندہ رہنے کی خبر دی جاتی ہے، تاہم وہ علاج کی تلاش میں غیر منظور شدہ ادویات حاصل کرنے اور دیگر مریضوں کی مدد کرنے کی کوشش کرتا ہے۔
چوتھے نمبر پر 2007 کی فلم ’’دی بورن الٹی میٹم‘‘ ہے، جس میں میٹ ڈیمن نے جیسن بورن کا کردار ادا کیا ہے۔ فلم میں جیسن بورن اپنے ماضی کے راز جاننے کی کوشش کرتا ہے اور مختلف ممالک میں خفیہ اداروں سے بچتے ہوئے اپنے مقصد کی جانب بڑھتا ہے۔ فلم نے روٹن ٹماٹوز پر 92 فیصد درجہ بندی حاصل کر رکھی ہے۔تیسرے نمبر پر 2017 کی فلم ’’کال می بائی یور نیم‘‘ شامل ہے۔ فلم کی کہانی 1980 کی دہائی کے اٹلی میں ایک نوجوان کی زندگی کے گرد گھومتی ہے، جہاں موسم گرما کے دوران اس کی ملاقات اپنے والد کے معاون سے ہوتی ہے اور دونوں کے درمیان گہرا جذباتی تعلق قائم ہوجاتا ہے۔ فلم میں ٹموتھی شالامے کی اداکاری کو خاص طور پر سراہا گیا۔دوسرے نمبر پر الفریڈ ہچکاک کی شہرۂ آفاق فلم ’’سائیکو‘‘ ہے، جو 1960 میں ریلیز ہوئی تھی۔ فلم میں ایک خاتون اپنے مالک کے پیسے چوری کرکے فرار ہوتی ہے اور راستے میں ایک ہوٹل میں قیام کرتی ہے، جہاں پراسرار واقعات کا سلسلہ شروع ہوجاتا ہے۔ روٹن ٹماٹوز پر فلم کی درجہ بندی 97 فیصد ہے۔
یہ بھی پڑھیں: امریکی فوج ایران کی سرحدوں سے ایک ہزار کلومیٹر پیچھے ہٹ گئی، ایرانی کمانڈر کا دعویٰ
فہرست میں پہلے نمبر پر 2016 کی فلم ’’مون لائٹ‘‘ ہے، جسے گزشتہ دہائی کی بہترین فلموں میں شمار کیا جاتا ہے۔ بیری جینکنز کی ہدایت کاری میں بننے والی یہ فلم ایک نوجوان کی بچپن، لڑکپن اور جوانی کی زندگی، شناخت اور جذباتی کشمکش کو تین مختلف ادوار میں پیش کرتی ہے۔’’مون لائٹ‘‘ نے بہترین فلم کا آسکر ایوارڈ بھی حاصل کیا تھا اور ریلیز کے بعد اسے ناقدین کی جانب سے بھرپور پذیرائی ملی۔
