لاہور( پاک ترک نیوز) پنجاب حکومت نے نئے بجٹ میں نوجوانوں کو ریلیف دینے کے لیے بڑا منصوبہ تیار کر لیا۔ 50 ہزار الیکٹرک بائیکس اور 5 ہزار ای ٹیکسیاں بلا سود فراہم کرنے کی تجویز بجٹ میں شامل کر لی گئی، جبکہ مفت سفری سہولت کے مستقبل پر بھی غور جاری ہے۔
پنجاب حکومت آئندہ بجٹ میں طلبہ اور بے روزگار نوجوانوں کے لیے خصوصی پیکج متعارف کرانے جا رہی ہے۔ مجوزہ منصوبے کے تحت 50 ہزار الیکٹرک بائیکس اور 5 ہزار ای ٹیکسیاں آسان اقساط اور بلا سود قرضوں پر فراہم کی جائیں گی۔ منصوبے کا مقصد نوجوانوں کو بااختیار بنانا، روزگار کے نئے مواقع پیدا کرنا اور ماحول دوست ٹرانسپورٹ کو فروغ دینا ہے۔
وزیر ٹرانسپورٹ پنجاب بلال اکبر خان کا کہنا ہےنوجوانوں کو معاشی سرگرمیوں میں شامل کرنا حکومت کی ترجیح ہے۔ ای بائیکس اور ای ٹیکسیوں کی فراہمی سے روزگار کے مواقع بڑھیں گے اور آلودگی میں بھی کمی آئے گی
حکام کے مطابق ای ٹیکسی اسکیم کے تحت مستحق افراد کو آسان اقساط کے ساتھ بلا سود فنانسنگ فراہم کی جائے گی، جبکہ گاڑیوں کی رجسٹریشن اور دیگر اخراجات میں بھی خصوصی مراعات دی جا سکتی ہیں۔
دوسری جانب پنجاب حکومت مفت پبلک ٹرانسپورٹ سہولت کے مستقبل کا بھی جائزہ لے رہی ہے۔ وزیراعلیٰ پنجاب کو دی گئی بریفنگ میں تجویز پیش کی گئی ہے کہ اگر پٹرول کی قیمت 300 روپے فی لیٹر تک کم ہو جائے تو مفت سفری سہولت ختم کی جا سکتی ہے۔اس حوالے سے فیصلہ جلد متوقع ہے۔
اعداد و شمار کے مطابق گزشتہ دو ماہ کے دوران 7 کروڑ سے زائد مسافروں نے مفت سفری سہولت سے فائدہ اٹھایا۔ تاہم حکام اس پروگرام کو مزید توسیع دینے یا نہ دینے کے حوالے سے مختلف تجاویز پر غور کر رہے ہیں۔
ماہرین کے مطابق اگر ای بائیکس اور ای ٹیکسیوں کا منصوبہ مؤثر انداز میں نافذ ہوا تو نہ صرف نوجوانوں کو روزگار ملے گا بلکہ ایندھن کے درآمدی بل اور فضائی آلودگی میں بھی کمی لانے میں مدد ملے گی۔ اب سب کی نظریں آئندہ بجٹ پر ہیں کہ حکومت ان منصوبوں کے لیے کتنے فنڈز مختص کرتی ہے۔
