لاہور( پاک ترک نیوز) پاکستان میں مہنگائی سے متاثرہ عوام کے لیے اہم پیش رفت سامنے آئی ہے۔ وفاقی حکومت نے فیول سبسڈی اسکیم کے تحت پانچویں اور چھٹی قسط جون 2026 کے دوران جاری کرنے کا فیصلہ کر لیا ہے، جس کے تحت مستحق افراد کو مجموعی طور پر 4 ہزار روپے فراہم کیے جائیں گے۔
میڈیا رپورٹس کے مطابق یہ فیصلہ نائب وزیرِ اعظم اسحاق ڈار کی زیرِ صدارت ہونے والے ایک اعلیٰ سطحی اجلاس میں کیا گیا، جس میں ٹرانسپورٹ آپریٹرز، موٹر سائیکل مالکان اور کسانوں کے لیے جاری سبسڈی پروگرام کا تفصیلی جائزہ لیا گیا۔
نائب وزیرِ اعظم آفس سے جاری اعلامیے کے مطابق اجلاس میں اسکیم کی پیش رفت، شفافیت اور مستحق افراد تک امداد کی مؤثر فراہمی پر غور کیا گیا۔ اعلامیے میں بتایا گیا کہ گزشتہ دو ماہ کے دوران اسکیم کی چار اقساط ہفتہ وار بنیادوں پر کامیابی کے ساتھ جاری کی جا چکی ہیں۔
اسحاق ڈار نے اب تک کی پیش رفت پر اطمینان کا اظہار کرتے ہوئے متعلقہ اداروں کو ہدایت کی کہ اسکیم پر مؤثر عملدرآمد کو یقینی بنایا جائے اور مانیٹرنگ کے نظام کو مزید مضبوط بنایا جائے تاکہ زیادہ سے زیادہ مستحق افراد اس سے فائدہ اٹھا سکیں۔
اجلاس میں صوبائی حکومتوں کے ساتھ رابطہ کاری اور اسکیم میں شفافیت و جوابدہی کے نظام کو مزید بہتر بنانے پر بھی تبادلہ خیال کیا گیا۔
دوسری جانب وفاقی حکومت نے پٹرولیم مصنوعات کی نئی قیمتوں کا اعلان کر دیا ہے۔ حکومتی نوٹیفکیشن کے مطابق پٹرول اور ڈیزل کی قیمتوں میں مزید کمی کی گئی ہے، جس کا مقصد عوام کو ریلیف فراہم کرنا اور ایندھن کی عالمی قیمتوں میں کمی کا فائدہ صارفین تک پہنچانا ہے۔
یہ بھی پڑھیں: پٹرول 4روپے لٹر سستا ،ڈیزل کی قیمت برقرار
