میڈرڈ ( پاک ترک نیوز) برطانیہ کے زیرانتظام علاقے جبلِ طارق (جبرالٹر) اور اسپین کے درمیان 118 سال سے قائم سرحدی کنٹرول پندرہ جولائی سے ختم ہونے جا رہا ہے، جس کے بعد دونوں علاقوں کے درمیان لوگوں اور سامان کی آمدورفت پہلے کے مقابلے میں کہیں زیادہ آسان ہو جائے گی۔
یہ اقدام برطانیہ کے یورپی یونین سے انخلا کے بعد برطانیہ اور یورپی یونین کے درمیان طویل مذاکرات کے نتیجے میں ہونے والے معاہدے کا حصہ ہے، جس کا مقصد سرحد پر طویل انتظار اور تجارتی رکاوٹوں کا خاتمہ کرنا ہے۔
جبلِ طارق کی تقریباً 40 ہزار آبادی میں روزانہ قریب 15 ہزار اسپینی شہری ملازمت کے لیے سرحد عبور کرتے ہیں۔ سرحدی چیکنگ کے باعث انہیں روزانہ طویل قطاروں اور گھنٹوں کے انتظار کا سامنا کرنا پڑتا تھا، تاہم نئے انتظامات سے یہ مشکلات بڑی حد تک ختم ہونے کی توقع ہے۔
معاہدے کے تحت جبلِ طارق کو یورپی کسٹمز یونین اور شینگن فری ٹریول زون سے ہم آہنگ کیا جائے گا، جبکہ شینگن سے باہر کے ممالک، بشمول برطانیہ، سے آنے والے مسافروں کی امیگریشن جانچ جبلِ طارق کے ہوائی اڈے اور بندرگاہ پر اسپین اور جبلِ طارق کے حکام مشترکہ طور پر کریں گے۔
جبلِ طارق کے چیف منسٹر فیبین پیکارڈو نے اس معاہدے کو تاریخی پیش رفت قرار دیتے ہوئے کہا کہ اس سے اسپین، یورپی یونین اور جبلِ طارق کے درمیان لوگوں اور اشیا کی نقل و حرکت میں غیرمعمولی آسانی پیدا ہوگی، جس سے تجارت، سیاحت اور سرحدی کارکنوں کو بھرپور فائدہ پہنچے گا۔
دوسری جانب اسپین کے قصبے لا لینیہ ڈی لا کونسیپسیون کے میئر خوان فرانکو نے کہا کہ سرحد کھلنے سے مقامی معیشت کو نمایاں فائدہ ہوگا، کیونکہ اس شہر کی بہت سی کمپنیوں کی آمدنی کا بڑا حصہ جبلِ طارق سے آنے والے گاہکوں پر منحصر ہے۔
یہ بھی پڑھیں : فٹبال ورلڈ کپ ،اسپین آسٹریا کو ہر اکر پری کوارٹر فائنل میں پہنچ گیا
معاہدے کے تحت جبلِ طارق میں فروخت ہونے والی اشیا پر اب یورپی یونین کے قوانین کا اطلاق ہوگا۔ اس کے علاوہ ویلیو ایڈڈ ٹیکس نہ ہونے کی وجہ سے درآمدی ڈیوٹی کی جگہ ٹرانزیکشن ٹیکس متعارف کرایا جا رہا ہے، جو ابتدائی طور پر 15 فیصد ہوگا اور بعد میں بڑھا کر 17 فیصد کر دیا جائے گا، جبکہ بعض اشیا پر ایکسائز ڈیوٹی بھی بڑھائی جائے گی۔
یاد رہے کہ اسپین اور برطانیہ کے درمیان جبلِ طارق کی خودمختاری کا تنازع کئی دہائیوں سے جاری ہے، تاہم نئے معاہدے کو دونوں فریقوں نے خطے میں تعاون اور اقتصادی روابط کے ایک نئے دور کا آغاز قرار دیا ہے۔
