امریکی 250ڈالر کے نوٹ پر ٹرمپ کی تصویر لگے گی

واشنگٹن (پاک ترک نیوز) امریکی وزیر خزانہ اسکاٹ بیسنٹ نے ٹرمپ کی تصویر والے 250 ڈالر کے نوٹ کے منصوبے کی تصدیق کر دی،کہتے ہیں صدر ڈونلڈ ٹرمپ کی تصویر والا نیا 250 ڈالر کا نوٹ چھاپنے کی تیاریاں جاری ہیں، تاہم اس نوٹ کو باضابطہ طور پر گردش میں لانے یا نہ لانے کا فیصلہ قانون سازی کریں گے۔
امریکی قانون کے تحت کسی بھی زندہ شخص کی تصویر امریکی کرنسی پر شائع نہیں کی جا سکتی، تاہم گزشتہ سال ایک بل پیش کیا گیا تھا جس کا مقصد اس قانون میں ترمیم کرکے موجودہ اور سابق صدور کو کرنسی پر جگہ دینے کی اجازت دینا ہے۔وزیر خزانہ اسکاٹ بیسنٹ نے کہا کہ قانون میں ممکنہ تبدیلی کے پیشِ نظر نئے نوٹ کا ڈیزائن پہلے ہی تیار کر لیا گیا ہے۔
انہوں نے کہا، اس وقت ایوانِ نمائندگان اور سینیٹ میں ایسی قانون سازی زیر غور ہے جس کے تحت پہلی شرط میں تبدیلی کی جا سکتی ہے تاکہ ایک زندہ شخصیت، کو 250 ڈالر کے نوٹ پر شامل کیا جا سکے۔ میرے خیال میں اس میں کوئی نامناسب بات نہیں کہ امریکا کے موجودہ صدر کی تصویر 250ویں سالگرہ کے یادگاری نوٹ پر ہو۔
اگر ٹرمپ کی تصویر والا نوٹ جاری کیا جاتا ہے تو یہ 2025 میں وائٹ ہاؤس میں واپسی کے بعد سرکاری حیثیت میں ان کے ذاتی برانڈ کو مزید نمایاں کرنے کی ایک نئی مثال تصور کی جائے گی۔