وزیراعظم کی زیرِصدارت وفاقی کابینہ کا اجلاس آج ہوگا، بڑے فیصلے متوقع

اسلام آباد(پاک ترک نیوز) وزیراعظم شہباز شریف کی زیرصدارت وفاقی کابینہ کا اہم اجلاس آج منعقد ہو گا، جس میں ملکی اہم معاملات سے متعلق 6 نکاتی ایجنڈے پر غور کیا جائے گا۔
وفاقی کابینہ کے اجلاس میں پاکستان اور عرب ریاستوں کے درمیان آزاد تجارتی معاہدے کی منظوری دی جائے گی، جس کا مقصد دو طرفہ تجارتی روابط کو فروغ دینا اور سرمایہ کاری کے مواقع پیدا کرنا ہے۔
کابینہ اجلاس کے دوران سی کارگو شپنگ ڈاکومنٹس بل 2025 کے مسودے کی منظوری بھی دیے جانے کا امکان ہے جو بحری تجارتی عمل کو مزید مؤثر اور شفاف بنانے کی کوششوں کا حصہ ہے۔ وفاقی کابینہ غیر رجسٹرڈ ادویات کی درآمد کی اجازت میں توسیع کی منظوری دے گی تاکہ عوام کو ضروری ادویات کی فراہمی یقینی بنائی جا سکے۔
اجلاس میں ای او بی آئی پنشن میں یکم جنوری 2025 سے 15 فیصد اضافے کی منظوری بھی متوقع ہے، جس کا مقصد بزرگ شہریوں کو مالی ریلیف فراہم کرنا ہے۔ اس کے علاوہ، قومی کینیبِس کنٹرول اور ریگولیٹری پالیسی 2025 پیش کی جائے گی، جس کا مقصد متعلقہ شعبے میں قواعد و ضوابط کو واضح اور منظم بنانا ہے۔
اجلاس میں کابینہ کمیٹی برائے قانون سازی کے فیصلوں کی توثیق بھی کی جائے گی جبکہ دیگر اہم قومی امور بھی زیر بحث آئیں گے۔