مظفرآباد(پاک ترکنیوز ) آزاد جموں و کشمیر قانون ساز اسمبلی کے جنرل انتخابات 2026 کے دوسرے مرحلے کے تحت آج مظفرآباد ڈویژن کے عام انتخابی حلقوں اور پاکستان کے مختلف شہروں میں مقیم کشمیری مہاجرین کی 12 نشستوں سمیت مجموعی طور پر 21 حلقوں میں پولنگ جاری ہے۔
پولنگ کا آغاز صبح 8 بجے ہوا اور ووٹنگ کا عمل شام 5 بجے تک بغیر کسی وقفے کے جاری رہے گا۔ دوسرے مرحلے میں 12 لاکھ سے زائد رجسٹرڈ ووٹرز اپنا حقِ رائے دہی استعمال کریں گے۔
مظفرآباد ڈویژن کی 9 نشستوں پر 208 امیدوار میدان میں ہیں، جبکہ ان حلقوں میں رجسٹرڈ ووٹرز کی تعداد 8 لاکھ 9 ہزار 621 ہے۔ دوسری جانب مہاجرین کی 12 نشستوں پر 143 امیدوار ایک دوسرے کے مدمقابل ہیں۔
انتخابی عمل کے لیے مظفرآباد ڈویژن کے اضلاع میں 1,483 پولنگ اسٹیشن قائم کیے گئے ہیں، جہاں حساس اور انتہائی حساس پولنگ اسٹیشنز پر سکیورٹی کے سخت انتظامات کیے گئے ہیں۔
الیکشن حکام کے مطابق حلقہ ایل اے-28، ایل اے-29 اور ایل اے-31 کو انتہائی حساس قرار دیا گیا ہے۔ ان حلقوں میں مسلم لیگ (ن) کے شاہ غلام قادر، استحکام پاکستان پارٹی کے سردار تنویر الیاس، سابق وزیراعظم راجہ فاروق حیدر اور سپیکر قانون ساز اسمبلی چوہدری لطیف اکبر سمیت اہم سیاسی شخصیات کے درمیان سخت مقابلے کی توقع ہے۔
راولپنڈی ڈویژن میں مہاجرین کی تین نشستوں پر 27 ہزار 907 ووٹرز کے لیے 35 امیدوار انتخابی میدان میں ہیں، جبکہ سکیورٹی کے لیے 4 ہزار پولیس اہلکار تعینات کیے گئے ہیں۔ یہاں 175 میں سے 31 پولنگ اسٹیشنز کو حساس قرار دیا گیا ہے۔
