راولپنڈی(پاک ترک نیوز ) سعودی عرب کے وزیر ماحولیات، پانی و زراعت انجینئر عبدالرحمن الفضلی نے جی ایچ کیو راولپنڈی کا دورہ کیا، جہاں ان کی چیف آف آرمی اسٹاف فیلڈ مارشل سید عاصم منیر سے ملاقات ہوئی۔
آئی ایس پی آر کے مطابق ملاقات میں باہمی دلچسپی کے امور اور دوطرفہ تعاون کو مزید وسعت دینے کے حوالے سے تبادلہ خیال کیا گیا۔ دونوں جانب سے پاکستان اور سعودی عرب کے درمیان دیرینہ برادرانہ اور اسٹریٹجک تعلقات کو مزید مضبوط بنانے کے عزم کا اعادہ کیا گیا۔
آئی ایس پی آر کے مطابق سعودی وزیر نے علاقائی امن و استحکام کے فروغ میں پاکستان کے مثبت کردار کو سراہا۔
یہ بھی پڑھیں:ایران نے فیلڈ مارشل عاصم منیر کا دورہ انتہائی مثبت قرار دے دیا
ملاقات میں پاک سعودی برادرانہ تعلقات کے دائرہ کار کو دفاعی تعاون سے آگے بڑھاتے ہوئے زراعت اور ماحولیاتی شعبوں میں تعاون کے نئے امکانات پر بھی گفتگو کی گئی۔
دونوں جانب سے زراعت، پانی کے انتظام اور ماحولیاتی پائیداری کے شعبوں میں تعاون مزید بڑھانے پر زور دیا گیا۔
