راولپنڈی (پاک ترک نیوز)پاک فوج کے شعبہ تعلقات عامہ کے مطابق فیلڈ مارشل سید عاصم منیر نے کور ہیڈکوارٹرز پشاور کا دورہ کیا ہے۔ دورے کے دوران انہیں خیبر پختونخوا کی مجموعی سکیورٹی صورتحال، جاری انسدادِ دہشت گردی آپریشنز اور سرحدی انتظامات پر تفصیلی بریفنگ دی گئی۔
بریفنگ کے دوران صوبے میں تعینات فوجی فارمیشنز کی آپریشنل تیاریوں کا جائزہ لیا گیا۔ فیلڈ مارشل سید عاصم منیر نے افسران اور جوانوں کی پیشہ ورانہ مہارت اور بلند حوصلے پر مکمل اطمینان کا اظہار کیا۔ انہوں نے سکیورٹی چیلنجز اور خطرات سے مؤثر انداز میں نمٹنے کے لیے ہمہ وقت چوکنا رہنے اور اعلیٰ ترین آپریشنل تیاری برقرار رکھنے کی سخت ہدایت کی۔
فیلڈ مارشل نے دوٹوک الفاظ میں عزم ظاہر کیا کہ بھارت کی سرپرستی میں سرگرم دہشت گرد تنظیموں کے خلاف کارروائیاں پوری شدت اور عزم کے ساتھ جاری رکھی جائیں گی۔ انہوں نے واضح کیا کہ دہشت گردوں کو جہاں بھی پایا گیا، انہیں بھرپور اور فیصلہ کن جواب دیا جائے گا۔
یہ بھی پڑھیں: آئی ایم ایف نے پاکستان کیلئے خطرے کی گھنٹی بجا دی
ترجمان آئی ایس پی آر کے مطابق، فیلڈ مارشل سید عاصم منیر نے پاکستان کے غیور عوام، شہداء اور غازیوں کی لازوال قربانیوں کو شاندار خراجِ تحسین پیش کیا۔ انہوں نے اس عزم کا اعادہ کیا کہ عوام کی غیر متزلزل حمایت سے دہشت گردوں اور ان کے تمام گمراہ کن نظریات کو شکست فاش دی جائے گی۔
کور ہیڈکوارٹرز پشاور آمد پر کمانڈر پشاور کور نے فیلڈ مارشل سید عاصم منیر کا پرتپاک استقبال کیا۔
