اسلام آباد ( پاک ترک نیوز) وزیراعظم شہبازشریف نے پھر اپوزیشن کو میثاق جمہوریت اور بات چیت کی دعوت دے دی ،کہتے ہیں سیاسی مخالفین سے کوئی لڑائی نہیں ،،میں قدم بڑھانے کو تیار ہوں،ایوان گھر کی طرح ہے ،آپ بھی گھر آ جائیں۔
وزیراعظم شہبازشریف نے قومی اسمبلی میں اظہار خیال کرتے ہوئے کہا پاکستان کو مضبوط بنانا اور اس کی ترقی کیلئےمل کر کام کرنا ہے پاکستان ہے تو ہم سب ہیں ، اپوزیشن ارکان ہمارے بھائی ہیں ،ان سے کوئی لڑائی نہیں ۔ایک سے زیادہ مرتبہ کہا میثاق جمہوریت کی طرف بڑھیں ،میری انتہائی مخلصانہ آفرز کو ٹھکرا دیا گیا۔ آج بھی کہتا ہوں دیر نہیں ہوئی ،آئیں قدم بڑھائیں ۔
وزیراعظم شہبازشریف نے کہا صوبوں کو اپنے معاشی وسائل پرحق ہے۔ بلوچستان کا وسائل میں حصہ کسی سے ڈھکا چھپا نہیں دو ہزار دس کے این ایف سی ایوارڈ میں بلوچستان کے حصے میں سو فیصد اضافہ کیا گیا۔
وزیراعظم شہبازشریف نے کہا بلوچستان میں دہشت گردی کے پیچھے کون ہے ،سب جانتے ہیں ۔خیبر پختونخوا میں ہمارے جوان قربانیاں دے رہے ہیں ،۔ آزاد کشمیر ہیلی کاپٹر حادثے میں بائیس افسر اور جوان شہید ہوئے ۔ وہ جوان جو شہید ہوتے ہیں وہ اپنے بچوں کو یتیم کر جاتے ہیں اور کروڑوں بچوں کو یتیم ہونے سے بچاتے ہیں۔پرسوں جو ہم جنازے پڑھ کر آئے ہیں ننھے منے بچے انکو نہیں پتہ کہ انکے والد کہاں گئے۔
