اسلام آباد (پاک ترک نیوز )پاک سعودی ترکیہ تعاون سے پاکستان کو حاصل ہونے والے ممکنہ دفاعی اور اسٹریٹجک فوائد نے بھارتی میڈیا کی توجہ بھی حاصل کرلی ہے، جہاں پاک سعودی ترکیہ دفاعی معاہدے کو پاکستان کے لیے اہم دفاعی پیش رفت قرار دیا جا رہا ہے۔
بھارتی میڈیا انڈیا ٹوڈے کے مطابق پاکستان، سعودی عرب اور ترکیہ کے درمیان دفاعی تعاون پاکستان کی دفاعی صلاحیتوں میں اضافے کا باعث بن سکتا ہے۔
رپورٹ میں کہا گیا ہے کہ دفاعی انضمام، مشترکہ فوجی مشقیں اور ٹیکنالوجی کی منتقلی پاکستان کی دفاعی صلاحیت کو مزید مضبوط کرسکتی ہے۔
انڈیا ٹوڈے کے مطابق انٹیلی جنس شیئرنگ اور مشترکہ دفاعی پیداوار سے پاکستان کی جنگی تیاری میں مزید بہتری آنے کا امکان ہے۔
بھارتی میڈیا نے یہ بھی نشاندہی کی کہ دفاعی معاہدے کے نتیجے میں پاکستان کے لیے ترکیہ کی جدید ڈرون ٹیکنالوجی اور الیکٹرانک وارفیئر کی صلاحیتوں سے فائدہ اٹھانے کے امکانات بڑھ سکتے ہیں۔
رپورٹ کے مطابق سعودی عرب کی مالی معاونت اور ترکیہ کی جدید دفاعی ٹیکنالوجی پاکستان کے اہم اسٹریٹجک مفاد میں ہے۔
دفاعی ماہرین کے مطابق ترکیہ کی ٹیکنالوجی، سعودی عرب کے وسائل اور پاکستان کی آپریشنل صلاحیتیں مل کر ایک مؤثر دفاعی امتزاج تشکیل دینے کی صلاحیت رکھتی ہیں۔
ماہرین کا کہنا ہے کہ پاک سعودی ترکیہ دفاعی تعاون کی بڑھتی ہوئی اہمیت بھارت کے لیے ایک نیا چیلنج بن سکتی ہے۔
بھارتی میڈیا کی جانب سے معاہدے کے ممکنہ دفاعی فوائد کو اجاگر کیا جانا اس معاہدے کی علاقائی اور اسٹریٹجک اہمیت کے اعتراف کے طور پر دیکھا جا رہا ہے۔
