اسلام آباد: (پاک ترک نیوز)وزیراعظم محمد شہباز شریف نے عالمی یوم پرامن بقائے باہمی کے موقع پر اپنے پیغام میں کہا ہے کہ اس دن کا مقصد کرہ ارض پر تعلیم ، مکالمے اور بین المذاہب تعاون کے ذریعے تصادم اور کشیدگی کا مقابلہ کرنا ہے۔
وزیراعظم شہباز شریف نے اپنے پیغام میں کہا کہ یہ دن اس حقیقت کو اجاگر کرتا ہے کہ دنیا میں پائیدار امن صرف اس صورت ممکن ہے جب لوگ عزت وقار، باہمی احترام اور افہام و تفہیم کا طرز عمل اختیار کریں۔دنیا مختلف ثقافتوں، مذاہب، زبانوں اور نظریات کے تنوع سے مالا مال ہے اور یہ تنوع کوئی خطرہ نہیں بلکہ مثبت طاقت ہے۔ آج دنیا ایک ایسے دور سے گزر رہی ہے جب ممالک کو تنازعات، تقسیم اور متعدد عالمی چیلنجز کا سامنا ہے لہذا پر امن و بقائے باہمی کی ضرورت پہلے سے کہیں زیادہ بڑھ گئی ہے۔
وزیراعظم نے کہا کہ اسلامی تعلیمات بھی دیگر اقوام اور برادریوں کے ساتھ رواداری، شمولیت اور ہم آہنگ رویے پر زور دیتی ہیں۔ آئیے ہم انفرادی اور بحیثیت قوم مجموعی طور پر تقسیم کے بجائے مکالمے، تعصب کے بجائے سمجھ بوجھ، دشمنی کے بجائے رواداری کو اپنانے کے عزم کی تجدید کریں۔تاکہ پرامن بقائے باہمی محض ایک تصور نہ رہے بلکہ دنیا بھر کے انسانوں کے لیے ایک زندہ حقیقت بن جائے اور عملی اقدام کی بھی ترغیب دے۔آئیے ہم آنے والی نسلوں کے لیے مثال قائم کریں کہ اختلافات خطرہ نہیں بلکہ سیکھنے اور آگے بڑھنے کے مواقع ہیں۔ اور آئیے مل کر ایسی دنیا کی تعمیر کے لیے کام کریں جہاں تصادم کے بجائے تعاون اور امن غالب ہو۔
دنیا میں پائیدار امن صرف باہمی احترام سے ممکن ہے: وزیراعظم شہباز شریف
