کوئٹہ ( پاک ترک نیوز) نیشنل ڈیٹا بیس اینڈ رجسٹریشن اتھارٹی نے اپنی پاک آئی ڈی موبائل ایپ کا ورژن 5.6.8 جاری کر دیا ہے، جس میں بلوچستان کے شہریوں کے لیے گاڑیوں سے متعلق نئی ڈیجیٹل سہولیات شامل کی گئی ہیں۔
نادرا کے مطابق حکومتِ بلوچستان کے تعاون سے تیار کیے گئے اس اپڈیٹ کے تحت اب بلوچستان میں رجسٹرڈ گاڑیوں کے مالکان اپنی ڈیجیٹل رجسٹریشن کارڈ براہِ راست پاک آئی ڈی ایپ کے ذریعے حاصل کر سکیں گے۔
اس کے علاوہ، بلوچستان میں رجسٹرڈ گاڑیوں کی خرید و فروخت کے لیے بایومیٹرک تصدیق کی سہولت بھی متعارف کرائی گئی ہے، جس کے ذریعے شہری کسی دفتر جائے بغیر گھر بیٹھے اپنی شناخت کی تصدیق مکمل کر سکیں گے۔
نادرا کا کہنا ہے کہ ان نئی سہولیات سے بلوچستان کے شہریوں کو سرکاری خدمات تک آسان اور تیز رسائی حاصل ہوگی، جبکہ ڈیجیٹل عوامی خدمات کے دائرہ کار میں بھی مزید توسیع ہوگی۔
چند روز قبل نادرا نے پاک آئی ڈی ایپ کا ورژن 5.6.6 بھی جاری کیا تھا، جس میں ویو کارڈ نامی نیا فیچر شامل کیا گیا۔ اس فیچر کی مدد سے درخواست گزار قومی شناختی کارڈ کی درخواست جمع کرانے سے پہلے اپنے متوقع کارڈ کا پیشگی جائزہ لے سکتے ہیں، تمام معلومات کی تصدیق کر سکتے ہیں اور کسی بھی غلطی کو بروقت درست کر سکتے ہیں۔
یہ بھی پڑھیں: ٹرمپ کا ایران کیخلاف خوفناک منصوبہ ،برقی جنگی طیاروں کی تعیناتی
اسی ورژن میں خیبر پختونخوا کے لیے پیدائش، وفات، شادی اور طلاق کی ڈیجیٹل رجسٹریشن کی سہولت بھی پاک آئی ڈی ایپ میں شامل کی گئی تھی۔ یہ سروس ابتدائی طور پر پشاور کی تمام ویلج اور نیبرہڈ کونسلز میں شروع کی گئی ہے، جسے مرحلہ وار پورے صوبے تک توسیع دی جائے گی۔
