تہران ( پاک ترک نیوز) مشرقِ وسطیٰ میں کشیدگی خطرناک حد تک بڑھ گئی، ایران اور اسرائیل کے درمیان حملوں کا تبادلہ شدت اختیار کر گیا ہے۔ ایرانی پاسدارانِ انقلاب نے اسرائیل پر میزائلوں اور ڈرونز کی شدید بارش کرتے ہوئے اسے پاکستان، جرمنی اور اسپین کے عوام کے نام کیا گیا۔ ایرانی فوج کی جانب سے میزائلوں پر اظہارِ تشکر کے کلمات بھی تحریر کیے گئے، جبکہ مقامی میڈیا نے اس حوالے سے ویڈیوز بھی جاری کر دیں۔ پاسدارانِ انقلاب کے مطابق حملوں میں امریکی اور اسرائیلی اہداف کو نشانہ بنایا گیا، اشدود میں تیل کے ذخیرے اور اسٹوریج ٹینک تباہ کر دیے گئے۔ اسرائیلی شہر کریات میں ایک گاڑی جل کر خاکستر ہو گئی، جبکہ کفر قاسم میں میزائل حملے کے نتیجے میں دو افراد زخمی ہوئے۔ شمالی شہر نہاریہ میں بھی تباہی کی اطلاعات سامنے آئی ہیں۔
ایرانی کارروائیوں کا دائرہ خلیجی خطے تک بھی پھیل گیا، جہاں الظفرہ، العدیری اور علی السلم ایئر بیس سمیت امریکی فوجی اڈوں کو نشانہ بنایا گیا۔ حملوں میں ٹرانسپورٹ طیاروں، ڈرونز کے ہینگرز اور جیٹ فیول ٹینک کو نقصان پہنچا، جبکہ شیخ عیسیٰ بیس پر پیٹریاٹ میزائل سسٹم کا مرمتی ہینگر بھی تباہ ہونے کی اطلاعات ہیں۔ پاسدارانِ انقلاب بحریہ نے آبنائے ہرمز میں 3 بحری جہازوں کو وارننگ دے کر واپس بھیج دیا، جبکہ خلیجی ممالک میں امریکی اڈوں کے قریب رہنے والے افراد کو فوری انخلا کی ہدایت جاری کی گئی ہے۔
اُدھر اسرائیل کی جانب سے بھی ایران پر حملے جاری ہیں۔ رہائشی علاقوں پر بمباری کے نتیجے میں متعدد شہید ہو گئے۔ صورتحال کے پیش نظر خطے میں تشویش کی لہر دوڑ گئی ہے
اور عالمی برادری فوری جنگ بندی کے لیے متحرک ہونے پر زور دے رہی ہے۔
