محسن نقوی کرغزستان کا دورہ مکمل کرنے کے بعد وطن واپس پہنچ گئے ہیں
تہران ( پاک ترک نیوز) پاکستان کی جانب سے مشرق وسطیٰ میں قیامِ امن اور علاقائی استحکام کے لیے سفارتی کوششیں تیز کر دی گئی ہیں۔ وفاقی وزیر داخلہ محسن نقوی آج ایران کا اہم دورہ کریں گے، جہاں وہ ایرانی قیادت سے ملاقاتیں اور خطے کی صورتحال پر مشاورت کریں گے۔
تفصیلات کےمطابق وزیر داخلہ محسن نقوی آج ایران روانہ ہوں گے۔
ذرائع کے مطابق محسن نقوی کرغزستان کا دورہ مکمل کرنے کے بعد وطن واپس پہنچ گئے ہیں اور وزیراعظم شہباز شریف اور دیگر اعلیٰ حکام سے ملاقاتوں کے بعد تہران روانہ ہوں گے۔
ذرائع کا کہنا ہے کہ وزیر داخلہ ایرانی سپریم لیڈر آیت اللہ مجتبیٰ خامنہ ای کے لیے فیلڈ مارشل سید عاصم منیر کا خصوصی پیغام بھی لے کر جا رہے ہیں۔ وزیراعظم شہباز شریف نے بھی وزیر داخلہ کو مذاکرات اور علاقائی صورتحال کے حوالے سے خصوصی ہدایات دی ہیں۔
ایرانی میڈیا رپورٹس کے مطابق محسن نقوی اپنے دورۂ ایران کے دوران اعلیٰ ایرانی قیادت سے ملاقاتیں کریں گے، جن میں امریکا اور ایران کے درمیان ممکنہ معاہدے، مشرق وسطیٰ کی موجودہ صورتحال اور خطے میں امن و استحکام کے لیے مشترکہ اقدامات پر تبادلہ خیال کیا جائے گا۔
سفارتی حلقوں کے مطابق پاکستان خطے میں کشیدگی کے خاتمے اور مذاکرات کے ذریعے مسائل کے حل کی پالیسی پر عمل پیرا ہے اور وزیر داخلہ کا یہ دورہ اسی سلسلے کی ایک اہم کڑی قرار دیا جا رہا ہے۔
اس سےقبل وفاقی وزیر داخلہ محسن نقوی نے بشکیک میں علاقائی تعاون اور سیکیورٹی کے فروغ کے سلسلے میں روس، تاجکستان اور کرغزستان کے وزرائے داخلہ سے اہم ملاقاتیں کیں۔
روسی ہم منصب کے ساتھ ملاقات میں دونوں ممالک کے درمیان متعدد اہم معاہدوں پر دستخط کیے گئے۔ معاہدوں کے تحت غیر قانونی امیگریشن کی روک تھام، انسانی اسمگلنگ کے خلاف اقدامات اور غیر قانونی طور پر مقیم شہریوں کی وطن واپسی کے حوالے سے تعاون کو فروغ دیا جائے گا۔
دونوں ممالک نے انسدادِ منشیات اور نشہ آور اشیاء کی اسمگلنگ کی روک تھام کے لیے بھی اشتراکِ کار بڑھانے پر اتفاق کیا۔ اس موقع پر باہمی سکیورٹی تعاون اور معلومات کے تبادلے کے مختلف پہلوؤں پر بھی تبادلہ خیال کیا گیا۔
یہ بھی پڑھیں: ایران کے شہید سپریم لیڈر آیت اللّٰہ علی خامنہ ای کی نماز جنازہ کے انتظامات
