دوحہ(پاک ترک نیوز) امریکا کے خصوصی ایلچی اسٹیو وٹکوف اور سابق سینئر مشیر جیرڈ کشنر نے قطر کے دارالحکومت دوحہ میں قطری ثالثوں اور اعلیٰ حکام سے ملاقاتیں کیں ،مشرق وسطیٰ کی مجموعی صورتحال پر تبادلہ خیال کیا گیا۔
قطر کی وزارتِ خارجہ کے ترجمان ماجد الانصاری نے بتایا کہ امریکی وفد دوحہ میں قطری ثالثوں اور حکام کے ساتھ متعدد اہم علاقائی امور پر بات چیت کر رہا ہے۔ ان کے مطابق مذاکرات میں ایران سے متعلق پیش رفت بھی زیرِ غور آئے گی، جبکہ لبنان کی صورتحال پر بھی مشاورت کی جائے گی۔
ترجمان نے واضح کیا کہ امریکی وفد اس وقت ایرانی حکام کے ساتھ براہِ راست مذاکرات کے لیے دوحہ نہیں آیا۔ انہوں نے کہا کہ اس دورے کا مقصد قطری ثالثوں کے ساتھ مشاورت اور خطے کی مجموعی صورتحال کا جائزہ لینا ہے۔
ماجد الانصاری کے مطابق قطر بدستور خطے میں سفارتی رابطوں اور کشیدگی کم کرنے کی کوششوں میں اپنا کردار ادا کر رہا ہے، جبکہ مختلف فریقوں کے درمیان رابطوں کو برقرار رکھنے کے لیے بھی سرگرم ہے۔
