راولپنڈی :(پاک ترک نیوز)بلوچستان میں سیکیورٹی فورسز نے دو الگ الگ خفیہ معلومات پر مبنی کارروائیوں کے دوران بھارتی پشت پناہی سے سرگرم دہشت گرد نیٹ ورکس کو شدید دھچکا پہنچاتے ہوئے 41 دہشت گردوں کو ہلاک کر دیا۔
کارروائیوں کے دوران بھاری مقدار میں اسلحہ، دھماکا خیز مواد اور بینک ڈکیتی میں لوٹی گئی رقم بھی برآمد کر لی گئی۔
پاک فوج کے شعبہ تعلقات عامہ کے مطابق یہ کارروائیاں 29 جنوری 2026 کو ضلع ہرنائی اور ضلع پنجگور میں کی گئیں۔ پہلی کارروائی ہرنائی کے قریبی علاقے میں کی گئی جہاں دہشت گردوں کی موجودگی کی مصدقہ اطلاع پر فورسز نے ٹھکانوں کو گھیرے میں لے کر مؤثر کارروائی کی۔
شدید فائرنگ کے تبادلے میں بھارتی سرپرستی میں کام کرنے والے 30 دہشت گرد مارے گئے جبکہ ان کے زیر استعمال اسلحہ اور بارودی مواد بھی قبضے میں لے کر موقع پر ہی ناکارہ بنا دیا گیا۔
دوسری کارروائی ضلع پنجگور میں عمل میں لائی گئی جہاں ایک دہشت گرد ٹھکانے کو نشانہ بنا کر 11 مزید دہشت گردوں کو ہلاک کیا گیا۔ سیکیورٹی ذرائع کے مطابق ہلاک ہونے والے عناصر کے قبضے سے اسلحہ، گولہ بارود اور دسمبر 2025 میں ہونے والی بینک ڈکیتی سے لوٹی گئی خطیر رقم بھی برآمد ہوئی۔
یہ دہشت گرد ماضی میں متعدد سنگین دہشت گردانہ کارروائیوں میں ملوث رہے تھے۔
آئی ایس پی آر کا کہنا ہے کہ علاقے میں ممکنہ باقی ماندہ دہشت گردوں کے خاتمے کے لیے کلیئرنس آپریشنز جاری ہیں اور قومی ایکشن پلان کے تحت دہشت گردی کے مکمل خاتمے تک کارروائیاں بلاامتیاز جاری رہیں گی۔
صدر مملکت، وزیراعظم اور وفاقی وزیر داخلہ نے کامیاب آپریشنز پر سیکیورٹی فورسز کو خراج تحسین پیش کرتے ہوئے کہا ہے کہ ریاست دہشت گردی اور پراکسی جنگ کے خلاف اپنے عزم سے ایک انچ بھی پیچھے نہیں ہٹے گی۔
اعلیٰ قیادت کے مطابق ملک میں امن و استحکام کو یقینی بنانے کے لیے فورسز کی قربانیاں قابلِ فخر ہیں اور پوری قوم اس جدوجہد میں ان کے شانہ بشانہ کھڑی ہے۔
بلوچستان میں بڑا کریک ڈاؤن: بھارتی پراکسی نیٹ ورک تباہ، 41 دہشت گرد مارے گئے
