لاہور (پاک ترک نیوز )وفاقی وزیر داخلہ محسن نقوی نے کہا ہے کہ نئے صوبوں کے قیام کے لیے تمام سیاسی جماعتوں کا اتفاق ضروری ہے، سب راضی ہوں گے تو ہی نئے صوبے بنیں گے۔
این سی سی آئی اے لاہور میں پریس کانفرنس کرتے ہوئے محسن نقوی کا کہنا تھا کہ نئے صوبوں کے معاملے پر تمام جماعتوں کی رائے اہم ہے، بہترین حل عوام سے رائے لینا ہے، اگر عوام نئے صوبوں کے قیام کے حق میں نہیں تو وہ عوام کے ساتھ کھڑے ہوں گے۔
انہوں نے کہا کہ پیپلز پارٹی، مسلم لیگ ن سمیت تمام سیاسی جماعتیں ہمارے لیے اہم ہیں، نئے صوبوں کے معاملے پر کسی قسم کا اختلاف نہیں ہونا چاہیے، تمام فیصلے باہمی اتفاق رائے سے ہوں گے۔
بانی پی ٹی آئی اور ان کے اہلخانہ سے متعلق سوال پر محسن نقوی نے کہا کہ گزشتہ ایک دو روز سے مختلف افواہیں گردش کر رہی ہیں، تاہم بانی پی ٹی آئی کو ان کا قانونی حق اور عدالت سے جو ریلیف ملے گا، وہی دیا جائے گا، باقی معاملات میں کوئی تبدیلی نہیں آئی۔
وفاقی وزیر داخلہ کا مزید کہنا تھا کہ بچیوں کو بلیک میل کرنے والوں کے خلاف زیرو ٹالرنس پالیسی ہے، آن لائن فراڈ کے زیادہ تر واقعات میں خواتین کو نشانہ بنایا جا رہا ہے۔
محسن نقوی نے کہا کہ ملک سے کرپشن کا خاتمہ حکومت کی ذمہ داری ہے، وزارت داخلہ میں موجود کرپٹ عناصر کے خلاف کارروائیاں کی گئی ہیں، عوام کرپٹ افراد کی نشاندہی کریں، ان کے خلاف سخت کارروائی ہوگی۔
انہوں نے اسلام آباد میں زمینوں پر قبضے کو افسوسناک قرار دیتے ہوئے کہا کہ جس بے دردی سے سرکاری اور نجی زمینوں پر قبضے کیے گئے ہیں، اس کی دنیا میں مثال نہیں ملتی۔
